.png)
Partia Demokratike ka reaguar pas fjalës së Sali Berishës në Kuvend, duke kundërshtuar qëndrimin e këtij të fundit për punën e komisionit hetimor. Jo vetëm. Ndryshe nga Berisha, PD e ka fokusuar reagimin e saj tek Arben Ahmetaj, te cilin, ish-kryeministri e “kurseu” deri diku kur foli për aferën e inceneratorit të Tiranës, që përgjegjës kryesor sipas tij kishte Erion Veliajn.
“Deputetët e PD-së në komisionin hetimor kanë zbuluar përfshirjen e Arben Ahmetajt në aferën e inceneratorëve.
Përpjekjet e ‘non gratave’ të shpallura dhe të pashpallura për të sulmuar komisionin kanë për qëllim mbrojtjen e individëve të korruptuar në këmbim të mbështetjes financiare dhe elektorale. Aleanca e të korruptuarve nuk do ta ndal PD-në t’i shkojë deri në fund zbardhjes së kësaj afere. Çdo ditë është dhe më e qartë se si janë përfshirë ministra e funksionarë të lartë në shkelje të çdo ligji. Një ndër ta është Arben Ahmetaj.
Koncesioni i inceneratorit të Elbasanit i është dhënë “Albtek Energy” me ‘negocim pa shpallje’, procedurë që ligji nuk e parashikon.
Arben Ahmetaj ka dhënë miratimin për t’i dhënë koncesionin kompanisë “Albtek Energy” me një procedurë që është në kundërshtim me ligjin.
Të tre inceneratorët nuk kanë pasur leje mjedisore.
Koncensoni iu dha një kompanie që nuk ka asnjë ditë eksperiencë në fushën e incenerimit.
Edhe sot vazhdojmë të paguajmë para për procedura korruptive, për kontrata korruptive.
430 milionë euro kanë shkuar në xhepat e pushtetarëve të lidhur me Klodian Zoton, Mirel Mertirin, Stela Gugallën.
Edi Rama, Ëngjëll Agaçi, Arben Ahmetaj, Damjan Gjiknuri, Lefter Koka, Erjon Veliaj kanë vepruar si një grup i strukturuar kriminal”, thuhet në deklaratën e PD.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
