Ministri i Jashtëm grek, Nikos Dendias zhvilloi sot një vizitë zyrtare në Kosovë ku u prit nga Presidentja Vjosa Osmani.
Sipas njoftimit të shpërndarë nga Presidenca e Kosovës, gjatë takimit me ministrin Dendias, Presidentja Osmani ka shprehur gatishmërinë e thellimit të bashkëpunimit të mëtejshëm mes dy shteteve duke shpresuar që së shpejti të formalizohet vendimi për njohjen e pavarësisë së Republikës së Kosovës nga Greqia.
Në njoftimin e Presidencës thuhet se një pjesë e takimit iu kushtua zhvillimeve pas agresionit të Rusisë në Ukrainë.
Presidentja Osmani ka përsëritur qëndrimin se Kosova është plotësisht në linjë me sanksionet e BE-së dhe SHBA-së ndaj Rusisë, duke shprehur mbështetje për popullin ukrainas dhe duke bërë me dije se tashmë Kosova ka strehuar një grup të gazetarëve nga ky shtet, sikurse që është e hapur edhe për strehimin e refugjatëve të tjerë.
Gjithashtu Osmani gjatë takimit ka theksuar se Kosova dhe Greqia ndajnë të njëjtat vlera euroatlantike, ndaj ka kërkuar mbështetjen greke për anëtarësim në Këshillin e Evropës, Partneritetin për Paqe dhe NATO, si një garanci jo vetëm për shtetin e Kosovës, por edhe për rajonin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
