.png)
Parlamenti Europian miraton strategjinë e re për zgjerimin e BE-së, teksa shprehet kundër Ballkanit të Hapur.
Sa i përket transformimit demokratik dhe socio-ekonomik të vendeve kandidate për në BE, Parlamenti Europian shpreh rezerva të forta për nismën e Ballkanit të Hapur, si një iniciativë që nuk bazohet në rregullat e Unionit dhe nuk përfshin të gjitha vendet.
“Shprehim rezerva të forta për çdo iniciativë rajonale të bashkëpunimit ekonomik që nuk përfshin të gjashtë vendet e Ballkanit Perëndimor dhe nuk bazohet në rregullat e BE-së, siç është nisma e Ballkanit të Hapur.”
Në tekstin e miratuar nga Parlamenti Europian për strategjinë e re të zgjerimit, kërkohet rritja e përpjekjeve drejt marrëdhënieve të mira fqinjësore mes vendeve të rajonit, bashkëpunimi gjithëpërfshirës dhe efektiv social-ekonomik në nivel rajonal dhe solidaritet në vendet që kërkojnë të anëtarësohen në BE, si dhe bashkëpunimi ndërkufitar rajonal ndërmjet shteteve anëtare të BE-së dhe vendeve partnere përgjatë kufijve të jashtëm të BE-së.
Ndër të tjera në deklaratë thuhet:
“Të rritet konkurrenca ekonomike dhe kohezioni social në Ballkanin Perëndimor përmes reformave strukturore dhe duke vendosur bashkëpunim ekonomik rajonal, që është i pranueshëm për të gjashtë vendet, duke ndjekur përafrimin e mëtejshëm me standardet dhe ligjet e BE-së dhe duke kontribuar në procesin e integrimit në BE”.
Në këtë kontekst, Parlamenti Europian thotë se mirëpret marrëveshjet e fundit në Samitin e Procesit të Berlinit, në veçanti përfundimin e marrëveshjeve rajonale të lëvizjes për lirinë e udhëtimit me karta identiteti si dhe njohjen e diplomave akademike e certifikatave profesionale.
Deklarata shpjegoi se raporti “thekson se nëse BE-ja dëshiron të jetë një lojtar gjeopolitik, ajo duhet të mbetet një projekt i hapur, dhe gjithashtu propozon një afat të qartë: negociatat e pranimit duhet të përfundojnë deri në fund të vitit 2030”.
Rezoluta njohu rëndësinë e politikës së zgjerimit në dritën e rrethanave aktuale gjeopolitike të shkaktuara nga agresioni rus ndaj Ukrainës, si dhe zvogëlimin e efektivitetit të politikës së zgjerimit “për shkak të dështimit të BE-së për të përmbushur premtimet e veta”.
“Për të mësuar nga gabimet e kaluara dhe për të përmirësuar politikën e zgjerimit në tërësi, BE-ja duhet ta transformojë procesin e anëtarësimit në mënyrë që të jetë më e përgjegjshme ndaj meritave, si dhe kthimit të prapambetur të demonstruar nga vendet kandidate”, theksohet në rezolutë.
Disa nga hapat konkretë të rekomanduar nga PE drejt arritjes përfshijnë heqjen e kërkesës për unanimitet kur vendoset për hapjen dhe mbylljen e grupeve dhe kapitujve, si dhe negociatat e anëtarësimit dhe futjen e shumicës së cilësuar për votat që lidhen me procesin e anëtarësimit. Më tej, ai u bën thirrje shteteve anëtare që “të shmangin përdorimin e mosmarrëveshjeve të pazgjidhura dypalëshe dhe rajonale për të bllokuar proceset e anëtarësimit të vendeve kandidate”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
