Me kërkesë të qeverisë franceze farmacia Delpech në Paris ka filluar prodhimin e kapsulave të antibiotikut amoksicilinë. Çdo ditë pas punës ata prodhojnë ilaçe për të furnizuar rreth 5,000 farmaci në të gjithë Francën.
Prodhimi i amoksicilinës është një proces i thjeshtë, por industritë farmaceutike janë përballur me ulje të prodhimit. Fabien Bruno është farmacist dhe pronar i farmacisë Delpech në Paris.
“Kemi mbajtur maska gjatë dy viteve të fundit, kështu që njerëzit nuk gëzojnë imunitetin normal kur flasim për mënyrën se si reagojnë ndaj sëmundjeve, pasi ishim të tejmbrojtur. Ky është dimri i parë pa maska, ndaj jemi më të ndjeshëm ndaj sëmundjeve”.
Ilaçi amoksicilinë, i blerë në formë pluhuri në Spanjë, ndahet në dozat e duhura për fëmijët dhe paketohet në shishe të vogla plastike sipas porosive.
Amoksicilina është një antibiotik i zakonshëm që përdoret për trajtimin e shumë sëmundjeve të mushkërive, infeksioneve të veshit ose gripit.
“Objektivi i vendosur nga qeveria franceze është që të prodhojmë rreth një të tretën e nevojave për pediatrinë. Çka do të thotë të prodhojmë rreth 100,000 trajtime me amoksicilinë”, thotë pronari i farmacisë, mjeku Fabien Bruno.
Prodhimi në shkallë të vogël pritet të zgjasë deri në fillim të marsit pasi industria farmaceutike duhet të rifillojë punën për prodhimin e sasive të mjaftueshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
