.png)
Gazeta Si – Sekretari i Përgjithshëm i Bashkisë Tiranë, Alban Dokushi është paraqitur mesditën e kësaj të marte në SPAK, teksa eprori i tij, Erjon Veliaj po hetohet në “arrest me burg” nga Prokuroria e Posaçme për korrupsion e pastrim parash.
Nuk dihet pse është thirrur konkretisht Dokushi, por dyshimet e para janë lidhur me çështjet që kanë të bëjnë me kryetarin e tij, Erion Veliaj, i cili ndodhet në qeli.
Në dalje, ai ka deklaruar për mediat se e ka takuar kryebashkiakun me autorizimin e prokurorëve të posaçëm, duke lënë të kuptohet se marrja në pyetje e tij është bërë rreth përgjimeve që janë zhvilluar ndaj Veliajt në paraburgimin e Durrësit.
Dokushi njihet si ndër njerëzve më të afërt të Veliajt, ndërsa ka qenë me të edhe më 6 dhjetor kur kryebashkiaku u paraqit në SPAK dhe u mor në pyetje për 5 orë lidhur me denoncimin e bërë nga Nesti Angoni.
Më herët Dokushi ka mbajtur postin e Drejtorit të Drejtorisë Juridike në bashki, ku në drejtim të tij ka pasur një sërë kallëzimesh kryesisht për abuzime me tenderë.
Ndaj Veliajt rëndojnë akuzat për pastrim parash dhe korrupsion në 9 raste. Këtyre akuzave iu shtua edhe një tjetër dosje e SPAK, për të cilën prokurorët thanë se kanë përdorur përgjimet e siguruara në qelinë e kryebashkiakut, nga ku ky i fundit dyshohet se ka dhënë direktiva ndaj mediave për sulme ndaj prokurorëve që e hetojnë.
Disa ditë ditë më parë, pas dy seancave maratonë, Apeli i GJKKO la në fuqi masën “arrest me burg” për Veliajn, ndërsa ndryshoi masën për njërin prej biznesmenëve nën hetim, Elman Abule, për të cilin nga “arrest me burg”, u vendos në “arrest shtëpie”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
