Paralajmëroi ditë të vështira për Serbinë, Vuçiç takon QUINT-in. Diskuton për Kosovën

Nga Gazeta 'Si' - Presidenti i Serbisë, Aleksandar Vuçiç mbajti një takim në Beograd me ambasadorët e vendeve të QUINT-it (Shtetet e Bashkuara të Amerikës, Britania e Madhe, Franca, Italia dhe Gjermania).

Në takimin që nisi pak pas orës dhjetë, morën pjesë ambasadorët e SHBA-së, Britanisë së Madhe, Francës, Italisë dhe Gjermanisë, përkatësisht Christopher Hill, Edward Ferguson, Pierre Cauchard, Luka Gori, Anke Konard, si dhe kreu i delegacionit të Bashkimit Evropian në Beograd, Emanuel Gioffre.

Temë diskutimi e takimit ka qenë situata politike në Kosovë.

LEXO EDHE:
Vuçiç: Serbinë e presin ditë të vështira, po kërcënojnë drejtpërdrejt interesat kombëtare!

Pas takimit, Vuçiç ka shkruar në profilin e tij në Instagram se ka pasur një “bisedë të gjatë dhe të hapur me përfaqësuesit e QUINT-it dhe BE-së”, dhe se bisedimet do të vazhdojnë.

Siç njofton televizioni publik serb, RTS, në takim ka qenë edhe drejtori i Zyrës për Kosovën, Petar Petkoviç.

Takimi i mbajtur paraditen e së mërkurës, pasoi një postim të Vuçiçit një ditë më parë në Instagram, ku shkroi se Serbinë e presin ditë të vështira.

“Në këtë moment nuk është e lehtë të thuhet se çfarë lajmesh kemi marrë në 48 orët e fundit... Ato kërcënojnë drejtpërdrejt interesat tona jetike kombëtare, si të Serbisë ashtu edhe të Sërpskas. Në ditët në vijim do ta informoj popullin e Serbisë për të gjitha sfidat që na presin”, thuhet në mesazhin e tij të publikuar më 26 mars.

Një raund i ri i dialogut, siç është paralajmëruar, do të mbahet më 4 prill.

Përdorimi i dinarëve për pagesat me para të gatshme në Kosovë është ndaluar që nga 1 shkurti, kur Banka Qendrore e Kosovës nxori një vendim për zbatimin e rregullores e cila përcakton euron si valutën e vetme të vendit për pagesa me para të gatshme.

Kjo çështje shkaktoi edhe mosmarrëveshje ndërmjet Qeverisë së Kosovës dhe bashkësisë ndërkombëtare, pasi komuniteti serb në Kosovë ka vite që merr pagesa në dinarë nga buxheti i Serbisë.

Diplomatët perëndimorë i kërkuan Kosovës që ta pezullojë dekretin për t'u dhënë kohë qytetarëve të prekur për t'u përshtatur me praktikën e re. Në një intervistë së fundi për Radion Evropa e Lirë, kryeministri i Kosovës, Albin Kurti, ka thënë se propozimet për dinar, të cilat bien ndesh me dekretin e Bankës Qendrore të Kosovës, nuk do të pranohen.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.