.png)
Gazeta Si – Ish-kryeministri pakistanez Imran Khan, u arrestua mëngjesin e kësaj të marte në Islamabad teksa ishte në gjykatë.
Dje ushtria lëshoi një deklaratë të ashpër, në të cilën Khan akuzohej për akuza të rreme kundër një oficeri shërbimi.
Disa orë më vonë, në një sallë gjyqi në kryeqytet, disa persona nga agjencia kombëtare kundër korrupsionit, e arrestuan atë në lidhje me një sërë akuzash për korrupsion.
Khan kishte mbërritur për seancën dëgjimore me një makinë të blinduar dhe i shoqëruar nga dhjetëra burra, ndërsa mbështetësit e tij u grumbulluan përreth.
Dy muaj më parë, policisë iu desh të pezullonte një operacion për arrestimin e tij, pasi qindra u rreshtuan jashtë shtëpisë së tij në Lahore.
Khan është në fakt lideri politik më popullor në vend. Një ish-kampion i kriketit, ai themeloi partinë e tij, Pakistan Tehreek-e-Insaf (PTI, Lëvizja për Drejtësi në Pakistan) në vitet 1990 – në 1996, për të qenë të saktë – dhe u zgjodh kryeministër në vitin 2018.
Ai qëndroi në detyrë deri në prillin e kaluar, kur një votë mosbesimi në parlament e detyroi të jepte dorëheqjen.
Gjatë mandatit të tij, ekonomia ra dhe ushtria, e cila është gjithashtu një mjet i fuqishëm politik në vend (kundërshtarët e tij argumentojnë se ndihma e ushtrisë kontribuoi në zgjedhjen e tij), u largua prej tij.
Por Khan ishte në gjendje të ruante bazën e tij elektorale: për muaj të tërë ai vizitoi Pakistanin duke organizuar qindra mitingje me pjesëmarrje të mirë, gjatë të cilave ai akuzoi rregullisht strukturën ushtarake për tentativën e vrasjes së tij.
Po ashtu, ai akuzoi qeverinë e re të Shabbaz Sharifit, për manovrim me sistemin gjyqësor për ta penguar atë të shpallte zgjedhje të reja të përgjithshme, pasi mori fitore gjithëpërfshirëse verën e kaluar në votimet lokale në Punjab dhe Karaçi.
Këto akuza i kushtuan atij dhjetëra akuza për terrorizëm dhe korrupsion. Një përplasje kokë më kokë që ka ngritur klimën e tensionit në një vend të shkatërruar nga përmbytjet, që kanë detyruar miliona njerëz të lënë shtëpitë e tyre dhe ku sulmet vazhdojnë.
Në nëntor, gjatë një prej mitingjeve të tij në shesh, Khan u qëllua dhe u plagos në këmbë në atë që më vonë u quajt një atentat i vërtetë politik. Që atëherë, Khan ka kaluar shumicën e ditëve të tij i sigurt në rezidencën e tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
