Nga Gazeta ‘Si’- Në Këshillin e Legjislacionit opozita kërkoi zyrtarisht shkarkimin e kryetarit të Kuvenedit, Niko Peleshi.
Deputeti i Partisë Demokratike, Ivi Kaso, ka paraqitur një sërë shkeljesh që, sipas tij, përbëjnë bazë të fortë për largimin e Peleshit nga detyra.
“E vetmja vlerë që ka treguar maxhoranca në këto seanca të Kuvendit është forca e numrave. Ka ngritur kartonin dhe ka treguar një unitet jo të pashoq, por atë çka ka ndodhur gjithmonë. Nisma jonë është bërë sepse detyrat që i burojnë kryetarit të Kuvendit janë shkelur. Si ndjekës i zhvillimeve parlamentare, nuk kam parë ndonjëherë një sjellje të tillë,” deklaroi Kaso.
Sipas tij, janë shkelur dispozitat e Rregullores së Kuvendit, gjë që legjitimon kërkesën e opozitës për shkarkim.
Nga ana tjetër, Damian Gjiknuri, kërkoi kohë për shqyrtimin e kërkesës dhe sugjeroi një qasje procedurale.
“Kam një sugjerim të karakterit procedural. Për herë të parë po njihem me këtë kërkesë. I dëgjova ato që tha zoti Kaso, por mendoj se duhet kohë që të caktojmë një relator, nga ana e maxhorancës, për të bërë një relatim të plotë.
Më pas, mund të dalim me një mendim të përbashkët ose me dy raporte të ndara. Relatori do ndihmojë në qartësimin e pozicionit të secilës palë,” u shpreh Gjiknuri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
