Yield-et e instrumenteve të borxhit të qeverisë po vijojnë rritjen.
Në ankandin e kësaj jave, yield-i uniform i pranuar nga Ministria e Financave arriti në nivelin 4.7%. Ankandi i kësaj jave ishte rihapje e ankandit të këtyre instrumenteve që ishte zhvilluar në muajin korrik.
Ky ankand kishte rezultuar me një yield uniform dhe kupon prej 2.9%. Një rihapje e parë ishte zhvilluar në muajin korrik dhe yield-i uniform kishte kërcyer në nivelin 4.2%. Një muaj më pas, është shënuar një rritje e mëtejshme, tashmë në nivelin 4.7%.
Rezultat e rihapjeve të ankandit të obligacioneve 2-vjeçare dëshmojnë qartë ritmet shumë të shpejta të rritjes së yield-eve për insturmentet e borxhit të qeverisë shqiptare.
Bonot 12-mujore kanë arritur tashmë nivelin 3.73%, më i larti që prej vitit 2014.
Në rihapjen e kësaj jave të obligacioneve 2-vjeçare kërkesat totale arritën në 3.51 miliardë lekë, përkundrejt një shume të shpallur për financim prej 3 miliardë lekësh.
Pjesëmarrja e ulët në ankande ishte bërë shqetësuese për Ministrinë e Financave dhe muajin e kaluar ministrja Delina Ibrahimaj zhvilloi një takim me drejtues të bankave tregtare, për të kërkuar një rol më aktiv të tyre në ankande. Për momentin, sektori bankar duket se i është përgjigjur kësaj kërkese, duke pasur parasysh rritjen e ndjeshme të pjesëmarrjes në ankandet e zhvilluara gjatë dy javëve të fundit.
Këtë muaj Ministria e Financave do të zhvillojë ankandin e dytë të obligacioneve 15-vjeçare, instrumenti më afatgjatë i borxhit të qeverisë i emetuar deri më sot.
Emetimi i parë i këtij instrumenti u bë në nëntor të vitit të kaluar, ndërsa gjatë këtij viti janë zhvilluar tre rihapje.
Në rihapjen e fundit, të muajit maj, yield-i uniform i pranuar arriti në 6.9%, nga 5.88% që kishte qenë në ankandin fillestar, të nëntorit 2021.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
