Vlera e dëmeve pezull ka zbritur në më pak se 6.4 miliardë lekë në mesin e këtij viti duke rënë me 9.5% krahasuar me të njëjtën periudhë të vitit të kaluar, sipas të dhënave nga Autoriteti i Mbikëqyrjes Financiare(AMF).
Kjo vlerë rezulton në rënie për pesë nga tetë kompani të licencuara për sigurimet e jo-jetës. Dëmet pezull kanë rënë edhe për pjesën që i takon fondit të kompensimit të Byrosë Shqiptare të Sigurimeve, me 18% më pak krahasuar me një vit më parë.
Në gjashtë muajt e parë të vitit, kompanitë e sigurimeve kanë paguar 3.7 miliardë lekë dëme, shumë kjo sa 58% e totalit të dëmeve që janë pezull. Por, nëse në total dëmet pezull kanë pësuar rënie në vlerë, ato janë më të larta në numër rastesh.
Sipas AMF-së, numri i dëmeve pezull në fund të qershorit 2021 arriti në rreth 11 mijë, nga rreth 9200 që ishte në të njëjtën periudhë të një viti më parë.
Rënia e vlerës së dëmeve pezull krahasuar me vitin e kaluar duket se i detyrohet kryesisht shlyerjes së dëmeve të lidhura me tërmetin e fundit të vitit 2019. Sipas vlerësimeve të AMF-së, fatura totale e dëmeve të tërmetit arriti në rreth 4.7 miliardë lekë ose rreth 38 milionë euro.
Tejkalimi i efektit të përkohshëm të tërmetit duket edhe në vlerën e dëmeve të paguara në sigurimet e jo-jetës, që ka pësuar rënie me 10.6% krahasuar me një vit më parë.
Ndërkohë, dëmet pezull kanë shënuar një rritje të ndjeshme për kompanitë e sigurimit të jetës.
Ky segment i tregut gjatë vitit 2021 po vuan pasojat e rritjes së numrit të vdekjeve pas shpërthimit të pandemisë. Dëmet e paguara nga siguruesit e jetës gjatë gjysmës së parë të këtij viti u rritën me 60% krahasuar me të njëjtën periudhë të vitit më parë, ndërsa rritja vërehet edhe në vlerën e dëmeve pezull, që ka arritur në rreth dy milionë euro ose 32% më shumë krahasuar me të njëjtën periudhë të vitit të kaluar.
Dëmet pezull përfshijnë ato në proces vlerësimi, dëmet e miratuara, por të papaguara, apo edhe dëmet që janë objekt i çështjeve gjyqësore.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
