Nga Gazeta Si- Protesta e opozitës është mbyllur pas më shumë se 2 orësh. Pasi u zhvendosën drejt bashkisë së Tiranës, protestuesit u drejtuan tek selia e PD-së për të përfunduar protestën kombëtare.
Nga selia e Partisë Demokratike, Flamur Noka deklaroi se kjo ishte “protesta më madhështore dhe më historike, në temperaturë 40 gradë”.
“Të gjithë ata që protestuan treguan se shqiptarët e lirë nuk nënshtrohen. Sot u protestua nga qindra mijëra shqiptarë kundër narkoregjimit. Mesazhi ishte që Shqipëria nuk mund të jetë i vetmi vend i Europës pa zgjedhje të ndershme e të lira. Regjimi i narkos duhet të dëgjojë zërin e qytetarëve, sot foli shumica e shqiptarëve”, deklaroi Noka.
“Jemi të vendosur në betejën tonë, lirimi i liderit të opozitës dhe qeveria teknike për paqe sociale. Siç arritëm çdo qëllim, do të arrijmë edhe fitoren në këtë betejë. Kemi treguar se do të luftojmë dhe do të fitojmë. Opozita është në këmbë, ka qenë dhe do të jetë”, shtoi Noka.
I pyetur nëse do vazhdojnë protestat e përjavshme para bashkisë,Noka tha se do vazhdojnë, ndërsa ftoi të gjithë të bëhen pjesë javën tjetër, ditën e enjte në orën 11:00 para bashkisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
