.png)
Sipas një studimi, punonjësit që punojnë me inteligjencën artificiale (AI) kanë më shumë gjasa të jenë të vetmuar, të vuajnë nga pagjumësia dhe të pinë alkool pasi të mbarojë dita.
Studiuesit kanë zbuluar se puna me AI, e përdorur zakonisht në industrinë e marketingut, financës dhe prodhimit, mund të ketë efekte të dëmshme në jetën personale të punonjësve.
Ekipi, i udhëhequr nga studiues në Universitetin e Gjeorgjisë, kreu katër eksperimente në SHBA, Tajvan, Indonezi dhe Malajzi.
Në një studim, 166 inxhinierë në një kompani biomjekësore që punonin me sistemet e AI u anketuan për tre javë në lidhje me ndjenjat e tyre të vetmisë dhe ankthit.
Analiza zbuloi se punonjësit që ndërvepronin më shpesh me sistemet e AI kishin më shumë gjasa të përjetonin vetmi, pagjumësi dhe rritje të konsumit të alkoolit pas punës.
Eksperimente të tjera në SHBA, Indonezi dhe Malajzi, duke përfshirë kompanitë e menaxhimit të pronave dhe një kompani teknologjike, dhanë rezultate të ngjashme.
Studiuesi kryesor Pok Man Tang punonte në një bankë investimesh ku përdorte sistemet e AI, gjë që ai thotë se e shtyu të hulumtonte mbi këtë temë.
“Përparimi i shpejtë në sistemet e AI po sjell disa rreziqe të paeksploruara, duke përfshirë ndikimet potencialisht të dëmshme mendore dhe fizike për punonjësit”, tha ai.
Tang thotë se punëdhënësit mund të kufizojnë sasinë e kohës që punonjësit shpenzojnë duke punuar me sistemet e AI dhe të ofrojnë mundësi që ata të shoqërohen me njerëzit.
Gjetjet u botuan në Journal of Applied Psychology.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
