.png)
Dimri i kaluar ishte një dimër i rëndë për viruset e frymëmarrjes, i dominuar nga rritjet e RSV, gripit dhe Covid-19. Por ndërkohë që rastet po binin, një virus pak i njohur, që shkakton gati të njëjtat simptoma, infeksion në mushkëri, kollë, rrufë, dhimbje fyti dhe ethe, sapo kishte filluar.
Rastet e metapneumovirusit njerëzor, ose HMPV, u rritën këtë pranverë, sipas sistemeve të mbikëqyrjes së viruseve të frymëmarrjes të Qendrës Amerikane për Kontrollin dhe Parandalimin e Sëmundjeve. Ky virus mbushi njësitë e kujdesit intensiv me fëmijë të vegjël dhe të moshuar që janë më të rrezikuarit nga këto infeksione. Në kulmin e tij në mes të marsit, gati 11% e ekzemplarëve të testuar ishin pozitivë për HMPV, një numër që është rreth 36% më i lartë se mesatarja ndër vite. Megjithatë, shumica e njerëzve që u infektuan ndoshta as nuk e dinin se e kishin atë.
Ndryshe nga Covid-19 dhe gripi, nuk ka asnjë vaksinë për HMPV ose ilaçe antivirale për ta trajtuar atë. Në vend të kësaj, mjekët kujdesen për njerëzit e sëmurë rëndë duke trajtuar simptomat e tyre.
Një kërcënim i nënvlerësuar
Studimet tregojnë se HMPV shkakton po aq vdekje në SHBA çdo vit sa gripi dhe RSV. Një studim i mostrave të pacientëve të mbledhur mbi 25 vjet zbuloi se ishte shkaku i dytë më i zakonshëm i infeksioneve të frymëmarrjes tek fëmijët pas RSV. Një studim në Nju Jork i kryer gjatë katër dimrave zbuloi se ishte po aq e zakonshme tek të moshuarit e shtruar në spital sa RSV dhe gripi. Ashtu si ato infeksione, HMPV mund të çojë në kujdes intensiv dhe raste fatale të pneumonisë në të rriturit e moshuar.
Metapneumovirusi i njeriut u zbulua nga studiuesit holandezë në vitin 2001. Ata kishin 28 mostra nga fëmijët në Holandë me infeksione të pashpjegueshme të frymëmarrjes. Disa nga fëmijët kishin qenë shumë të sëmurë dhe kishin nevojë për oksigjen, por ata nuk rezultuan pozitivë për ndonjë patogjen të njohur.
Studiuesit i studiuan mostrat dhe panë diçka që dukej e lidhur me familjen paramyxoviridae, një grup virusesh që u jep njerëzve probleme si të frymëmarrjes, shytat dhe virusi sincicial i frymëmarrjes, ose RSV.
Një vështrim më i afërt i gjeneve të virusit tregoi se ishte metapneumovirusi i shpendëve, i cili infekton zogjtë. Virusi i ri u quajt metapneumovirus njerëzor. Shkencëtarët besojnë se ndoshta u hodh nga zogjtë te njerëzit në një moment dhe evoluoi prej andej.
Kur studiuesit testuan mostrat e gjakut nga 72 pacientë që ishin ruajtur që nga viti 1958, të gjithë treguan prova të ekspozimit ndaj virusit misterioz, duke treguar se ai kishte qarkulluar te njerëzit, i pazbuluar, për të paktën gjysmën e shekullit të kaluar.
“Infeksionet e frymëmarrjes janë shkaku kryesor i vdekjeve për fëmijët në mbarë botën dhe arsyeja nr. 1 pse fëmijët shtrohen në spital por shkencëtarët nuk e dinë se çfarë i shkakton një pjesë të mirë të tyre”, thotë John Ëilliams, pediatër.
Ai thotë se për shkak se testimi për HMPV bëhet rrallë jashtë spitaleve, është e vështirë të dihet sa të prekur ka në të vërtetë.
Një studim i vitit 2020 në Lancet vlerësoi se në mesin e fëmijëve më të vegjël se 5 vjeç, kishte më shumë se 14 milionë infeksione HMPV në 2018, më shumë se 600,000 shtrime në spital dhe më shumë se 16,000 vdekje.
Kompanitë po punojnë për vaksinat kundër tij dhe prodhuesi i vaksinës Covid-19 Moderna sapo përfundoi një studim të një vaksine mRNA kundër HMPV.
CDC rekomandon që mjekët të marrin në konsideratë testimin për HMPV në dimër dhe pranverë, kur ai arrin kulmin.
Burimi: CNN. Përshtati: Gazeta Si.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
