Një vagon hekuri: Veprën e parë të artit Bob Dylan e ekspozon në një kështjellë në Francë

Nga Gazeta Si – Muzikanti amerikan dhe laureati i Nobelit në letërsi Bob Dylan ka zgjedhur një kështjellë në jug të Francës, Château La Coste, pranë Aix-en-Provence, e cila është gjithashtu një qendër për artin dhe arkitekturën bashkëkohore, për të ekspozuar instalacionin e tij të parë të përhershëm, “Rail Car”, një vepër monumentale në hekur të farkëtuar.

Është një karrocë hekurudhore e zbrazët në qendër të vreshtit: vizitori mund të hyjë në këtë vepër, duke përzier cikle, çelësa, zinxhirë apo edhe shkallë. Në të njëjtën kohë, deri më 15 gusht dhe në të njëjtën zonë, Dylan ekspozon 24 piktura në një instalacion të titulluar Drawn Blank in Provence (2008-2013), i pari në Francë.

Këto piktura janë “bazuar në vizatimet e tij të bëra gjatë turneve të tij në Europë dhe Amerikë midis 1989 dhe 1991”, specifikon qendra e artit të kështjellës. Ekspozita do të prezantohet në pavijonin e ekspozitës të projektuar nga Renzo Piano në 2017 për kështjellën, dhe pikturat do të ekspozohen krahas veprave të Claude Monet, Henri Matisse dhe Marc Chagall.

I njohur ndërkombëtarisht si këngëtar dhe kompozitor, por edhe regjisor, aktor dhe artist vizual Bob Dylan ka shitur më shumë se 110 milionë disqe në mbarë botën dhe është nderuar me Çmimin Nobel për Letërsinë në vitin 2016.

Zgjedhja e Château La Coste është prestigjioze: është në fakt një pasuri e madhe që me kalimin e viteve është shndërruar në një muze të hapur, ku pret vepra, instalacione dhe projekte nga artistë dhe arkitektë të mëdhenj bashkëkohorë.

Jo vetëm pavijoni i projektuar nga Renzo Piano, por edhe pavijonet e tjera të shpërndara përreth pronës mbajnë firmën e emrave të mëdhenj të arkitekturës: nga braziliani Oscar Niemeyer te Jean Nouvel. Ndër artistët që firmosin punime dhe instalacione në gjelbërimin e kështjellës janë Louise Bourgeois, Tracey Emin, Richard Serra e shumë të tjerë.

Marrë nga La Repubblica, përshtati në shqip Gazeta Si

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.