Një milion fëmijë mund të vdesin nëse SHBA shkurton fondet për vaksinimet

Një organizatë globale shëndetësore ka paralajmëruar se një milion fëmijë mund të vdesin nga sëmundje të parandalueshme nëse SHBA ndërpret mbështetjen e saj financiare.

Dr Sania Nishtar, kreu i Gavi, një aleancë që blen vaksina kritike për vendet në zhvillim i tha BBC-së se një shkurtim në fondet e SHBA-së do të kishte një “ndikim katastrofik në sigurinë globale të shëndetit”.

Kjo pason një raport në Neë York Times se administrata Trump synon të ndërpresë financimin e Gavi dhe SHBA është donatori i tretë më i madh i aleancës.

SHBA ka premtuar 1.6 miliardë dollarë për periudhën 2026-2030, rreth 15% e financimit total të Gavi.

Që nga marrja e detyrës në janar 2025, presidenti i SHBA Donald Trump e ka bërë të qartë se dëshiron që shpenzimet jashtë shtetit të përputhen ngushtë me qasjen e tij “Amerika së pari”.

Sektori i zhvillimit ndërkombëtar është përgatitur për një efekt të thellë në programet humanitare në mbarë botën.

Agjencia Amerikane për Zhvillim Ndërkombëtar (USAID) ishte një nga agjencitë e para të shënjestruara nga Departamenti i Efiçencës së Qeverisë (Doge) i Elon Musk për shkurtime në fillim të vitit 2025, kur administrata Trump urdhëroi një ngrirje 90-ditore të të gjithë ndihmës së huaj amerikane.

Nga 500 milionë fëmijë që duhej të imunizoheshin në mbarë botën, 75 milionë do të humbisnin vaksinimin nëse Gavi humb fondet e SHBA-së, tha Dr Nishtar, duke rezultuar në vdekje nga sëmundje të parandalueshme si fruthi, tuberkulozi, pneumonia dhe poliomieliti.

Kjo do të nënkuptonte gjithashtu se aftësia e qeverive dhe e agjencive shëndetësore për ta mbajtur botën të sigurt përmes stoqeve të vaksinave kundër sëmundjeve të tilla si Ebola, kolera dhe mpox do të rrezikohej, tha ajo.

Organizata bamirëse mjekësore Medecins Sans Frontieres (MSF) pajtohet me paralajmërimin e Gavi për shkurtimet e mundshme të financimit.

“Pasojat e këtij vendimi politik do të jenë katastrofike,” tha shefja e programeve të MSF në SHBA, Carrie Teicher.

Qendrat e Afrikës për Kontrollin dhe Parandalimin e Sëmundjeve (Afrika CDC) “mbështet plotësisht” Gavi-n dhe po “angazhohet” me autoritetet amerikane për ndërprerjen e shkaktuar nga tërheqja e fondeve të SHBA për programet kryesore, tha menaxheri i urgjencave të CDC në Afrikë, Dr Ngongo Ngashi.

“Ne po i japim përparësi vaksinave rutinë, por ne gjithashtu e dimë se sa vendimtare janë vaksinat për emergjencat.”

Dr Ngashi tha gjithashtu se ishte kritike që të gjenden burimet e financimit, që nuk varen nga vendimi i partnerëve.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.