Gazeta Si – Igli Tare ishte vënë në kërkim të një portieri kalibri që kur Tomas Strakosha nuk rinovoi me Lacion. Portieri kuqezi e kishte ndarë mendjen për t’u larguar dhe në verë firmosi për Brentfordin në Premier Ligë, ku ka përfunduar në stol.
Tare dëshironte Karnesekin, por ai u dëmtua. Merkatoja e Lacios për portën u komplikua shumë, në skuadër mbërriti Maksimiano, por që në ndeshjen e parë ai u ndëshkua me karton të kuq.
Dhe ish-portieri i Specias, Ivan Provedel, shfrytëzoi shansin e tij. Me atë që ka treguar në këto javë kampionati, 28-vjeçari është transformuar në një mur te Lacio, duke qenë një pikë e fortë në rezultatet e deritanishme.
Shembulli i Provedel është një leksion për të gjithë futbollistët. Më shumë se një plan B, shtypi italian e ka konsideruar atë si një plan… P. Në sensin që kalimi i tij te Lacio ishte i detyruar, por që po rezulton vendimtar.
Pas 9 javësh kampionat, Lacio mban vendin e tretë, me 20 pikë. Ka katër fitore radhazi dhe deri tani ka pësuar 5 gola, shifra domethënëse për skuadrën dhe portierin që ka bërë të harrohet menjëherë Tomas Strakoshën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
