.png)
Gazeta Si – Pas një seance maratonë prej 8 orësh, gjyqtari i Gjykatës së Posaçme kundër Korrupsionit dhe Krimit të Organizuar, Erjon Bani ka lënë në fuqi masën e sigurisë “arrest në burg” ndaj kryebashkiakut të Tiranës, Erion Veliajt, i cili nuk do të qëndrojë në bllokun e sigurisë në Tiranë, por u dërgua menjëherë në paraburgimin e Durrësit.
Ndryshim i masës së sigurisë i është bërë vetëm Ajola Xoxës, bashkëshortes së Veliajt, e cila nga “arrest në shtëpi”, lirohet dhe do të ketë masën “detyrim paraqitje” dy herë në muaj dhe “ndalim për të dalë jashtë vendit” (bllokim të pasaportës).
Në arrest në burg do të vijojë të qëndrojë edhe biznesmeni Elman Abule. Po kështu edhe 5 biznesmenët e tjerë do të vijojnë të kenë masën “detyrim për t’u paraqitur”.
Mbi Veliajn dhe të tjerët rëndojnë një sërë akuzash si korrupsion, pastrim parash, shpërdorim detyre, fshehje e pasurisë.
Gjyqtari Bani mori këtë vendim pasi dëgjoi për më shumë se 6 orë personat e akuzuar, avokatët e tyre si dhe dy prokurorët e çështjes, Ols Dado dhe Altin Dumani. Gjyqtari qëndroi për më shumë se 1 orë në dhomën e këshillimit pasi dëgjoi të gjitha palët.
Erion Veliaj kërkoi lirimin nga qelia në këmbim të garancisë pasurore. Kërkesa e tij nuk u mor parasysh dhe do të vijojë të qëndrojë në “arrest në burg”.
Ajola Xoxa kërkoi lehtësim të masës nga “arrest në shtëpi” në “detyrim paraqitje” për shkak të fëmijës së mitur, kërkesë e cila u pranua.
Biznesmenët
Krahas dëshmisë së Veliaj janë zbardhur edhe kërkesat që biznesmenët bënë sot në GJKKO. Mësohet se Elman Abule me masën arrest në burg, kërkoi heqje të masës përballë garancisë pasurore.
Fatmir Bektashi ka kërkuar që t’i caktohet e njëjta datë në të cilën paraqitet edhe për dosjen Partizani. Gentian Sula ka kërkuar që të paraqitet njëherë në muaj për shkaqe shëndetësore. Ndërsa Meriman Palushi ka kërkuar heqje masë sigurise ose qe të paraqitet 2 herë në muaj.
Debatet dhe akuzat në seancë
Seanca për rivlerësimin e masës së sigurisë ndaj Kryebashkiakut të Tiranës Erion Veliaj, është zhvilluar me tensione dhe debate nga ky i fundit, në drejtim të hetuesve.
Veliaj mësohet t’i ketë bërë presion prokurorit Olsi Dado, ndërsa i ka thënë se e ka personale çështjen ndaj tij, pasi siç ka thënë kryebashkiaku, hetuesi i ka kërkuar leje ndërtimi. Më tej Veliaj i ka kërkuar prokurorit që të tërhiqet nga çështja.
“Ti je në konflikt interesi, e ke personale me mua. Më je paraqitur dy herë për leje ndërtimi, ke marrë leje ndërtimi nga ana ime. Pasi ke mbetur i pakënaqur më ke thënë ‘do ta mbash mend’. Ke dy rrugë, ose të largohesh nga kjo çështje, ose të rreshtohesh me ndërtuesit e tjerë këtu”, mësohet t’i jetë drejtuar Veliaj prokurorit.
Ndërsa, gjatë momentit kur Veliaj është shprehur në seancë, gjyqtari i çështjes, Erjon Bani, mësohet se i ka tërhequr vëmendjen për tonin e zërit dhe ruajtjen e qetësisë para gjykatës.
Lidhur me provat e paraqitura, Erion Veliaj deklaroi: “Nuk më është shpjeguar edhe sot pse jam i arrestuar, unë një kryetar bashkie që jam votuar nga populli i Tiranës, kam bërë detyrë time. Por mallkuar qoftë ai që punon në këtë vend, se bëhet objekt sulmi dhe gjendet në këtë situatë qe jam unë sot. Vila në Qerret nuk është e jona, është e natyrshme që aty do gjenden lodrat e fëmijës sim dhe se bashkëshortja ime është fëmijë i vetëm dhe vjehrra ime dhe nuk e di pse duket kaq e panatyrshme që të jenë lodrat e fëmijës tek shtëpia e gjyshes”.
Prokurori Dado iu kundërpërgjigj: “Të gjitha veshjet kishin kod unik dhe ishin veshje personale, buzëkuq dhe bizhuteri”.
Mësohet se Veliaj ka pasur një debat të fortë me prokurorin e çështjes, Olsi Dado, të cilin e ka akuzuar indirekt për përndjekjen e gruas së tij.
Nga ana tjetër Dado i ka kërkuar të ruajë etikën, duke i thënë që të mos flasë gjëra të tilla, pasi ndodhet në sallë gjyqi dhe jo në Facebook.
Mbështetësit solidarizohen me Veliajn
Seanca ishte parashikuar të niste në 08:30, por u vonua me gjysmë ore pasi nuk kishte drita. Seanca u shty për në 13:00, pasi kërkuan që të njihen me aktet hetimore, 6 fashikuj. Seanca nisi në orën 13:30 për t’u mbyllur në orën 19:20 dhe në orën 22:00 gjyqtari Bani dha vendimin.
Kanë qenë dhjetra mbështetës të kryebashkiakut që janë solidarizuar me të, si në orën 08:30 minuta kur Veliaj u shoqërua nga Blloku i Sigurisë në GJKKO për vlerësimin e masës së sigurisë ashtu edhe pasdite në orën 17:00.
Në të njëjtën kohë, kryeministri Edi Rama mbajti dëgjesë me grupin parlamentar të PS-së, ku foli për këtë çështje dhe për mënyrën si po veprojnë institucionet e drejtësisë.
Madje në momentin kur makina e burgut ku ndodhej kryetari i bashkisë Erjon Veliaj, mbështetësit i dolën para dhe për disa minuta penguan të lëvizte duke vendosur fletë të bardha në xhamin e parë të makinës.
Gabimi me dënimin e kryebashkiakut
Në nisje të seancës dy prokurorët e çështjes, Olsi Dado dhe Altin Dumani kanë saktësuar se Veliaj nuk është person i dënuar.
Kjo vjen, pasi në dosje, SPAK e prezantonte Veliajn si person të dënuar një ditë më parë, por në dokumentin e gjendjes gjyqësore, ku thuhej se Veliaj nuk rezulton i dënuar. Prokurorët kanë thënë se ka qenë një gabim i regjistrit elektronik.
Në fakt, faqja e parë e dosjes me këtë gafë, u shpërnda dje në rrjet, megjithëse Veliaj nuk ka qenë kurrë i dënuar më parë as për veprën e shpifjes.
Gjatë ditës së djeshme u publikua gjithashtu edhe dëshmia e penalitetit të kryebashkiakut, nga ku rezulton se ai është i padënuar.
Akuzat
Kreu i bashkisë së Tiranës u shoqërua nga agjentët e BKH-së më 10 Shkurt, pasi Gjykata e Posaçme i caktoi masën e sigurisë “arrest me burg”, i akuzuar për dy vepra penale, ajo e “korrupsionit pasiv” (në 9 raste) dhe “pastrim parash”.
Në të njëjtën seancë dolën para gjyqtarit edhe biznesmeni Elman Abule, i dyshuar për pastrim parash dhe pesë të tjerët detyrim paraqitje që janë Gentian Sula, Fatmir Bektashi, Meriman Palushi, Sokol Kryeziu dhe Shkëlqim Fusha.
Gjyqtari që ka miratuar masën e arrestit me burg për Erion Veliaj dhe detyrimin për paraqitje për bashkëshorten e tij Ajola Xoxa, shpjegon se ekziston dyshimi që ata mund të largohen, dhe se rrezikojnë të kryejnë krime njësoj të rënda si ato për të cilat po hetohen.
Për Erjon Veliajn, gjykata kujton se ai vijon të ushtrojë funksione publike dhe ekziston rreziku të abuzojë me detyrën. Po ashtu, ekziston rreziku të impaktojë provat dhe dëshmitarët.
Si shembull gjykata përmend sjelljen e kryebashkiakut që dyshohet se ju shkroi mesazh hetuesve të byrosë kombëtare të hetimit.
Një precedent tjetër i intimidimit të dëshmitarëve është edhe ai që hedh hije dyshimi edhe ndaj deputetes socialiste Klotilda Bushka, që dyshohet se ka orientuar shtetasen Ina Goxhaj se çfarë duhet të thoshte në SPAK.
Dëshmitares thotë SPAK, i është marrë telefoni duke ju zëvendësuar me një tjetër telefon. Ndërkohë që Abule dyshohet se ka pastruar paratë përgjatë një kohë të gjatë, ndryshe nga pesë biznesmenët të cilët ka të dhëna se kanë korruptuar për të marrë si shpërblim leje apo fonde publike.
Mes provave të administruara janë edhe deklaratat e pasurisë së kryebashkiakut Erion Veliaj prej 2013, si dhe informacioni i dëshmitarit X, i vetëidentifikuar si Nesti Angoni i cili në rruge anonime në 2023 dërgoi të dhëna në prokurorinë e posaçme, duke e vënë në lëvizje këtë të fundit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
