.png)
Në praninë e aktorëve Robert Ndrenika, Tinka Kurti, Luftar Paja, Kastriot Çaushi dhe Luiza Xhuvani, nisi ceremonia e punimeve të Teatrit të ri Kombëtar që ngjalli jo pak polemika e protesta dhe i ndau në dy kampe aktorët shqiptarë.
Vendimi solli reagim nga Aleanca për mbrojtjen e Teatrit, të cilët kundërshtuan shembjen dhe procedurat për ndërtimin e godinës së re.
Për të shmangur përplasjet e ceremonisë së sotme, i gjithë perimetri u rrethua me punonjës policie. Gjithashtu u bllokua pedonalja për të penguar kalimin e këmbësorëve, ndërsa Aleanca për teatrin protestoi në heshtje.
Gjatë fjalës së tij në ceremoni, Kryeministri Edi Rama, u shpreh se “ky projekt shkon përtej një teatri të mirë për Shqipërinë”.
“Ky është një tjetër gur i çmuar që praktikisht e kanë nxjerrë Tiranën jashtë vetes, jashtë kornizës së vjetër të vetes dhe e kanë projektuar si një kryeqytet evropian ku ndodhin gjëra dhe ku bëhen gjëra që tërheqin vëmendjen e të tjerëve.
Mund të bëhet një paralele me stadiumin. Stadiumin që e kishim dhe që praktikisht as për stadium nuk përdorej dot më, pasi u ndalua nga UEFA e FIFA organizimi i ndeshjeve ndërkombëtare. Ndërkohë, vijonte rezistenca absurde për të mos e prekur stadiumin, kur ishte e qartë që ai stadium ishte i vlefshëm vetëm në një pjesë të tij. Ne e ndërtuam stadiumin dhe unë jam i bindur që askujt nuk i shkonte në mendje se mund të vinte dita që në Shqipëri të luhej një finale evropiane (Conference League)”, shtoi Rama.
Sipas tij, e njëjta gjë do të ndodhë me teatrin: “Nuk do të jetë vetëm destinacion për dashamirësit e teatrit, por një vend ku do të organizohen edhe aktivitete ndërkombëtare”.
Duke kujtuar se që prej periudhës kur ishte ministër kulture i kishte shpallur luftë asaj godine të vjetër, Rama tha se edhe pse shumë vonë, me këtë projekt Tirana ka kapërcyer pritshmëritë.
Rama tha se kundërshtimi i opozitës është pjesë e strategjisë së saj, pasi sipas tij, opozita ka kundërshtuar gjithmonë projektet e reja në Shqipëri.
Për sa i përket kundërshtimit të projektit nga artistët, Rama tha se komuniteti i aktorëve ndoshta ka qenë pajtuar me realitetin për pamundësinë për të ndryshuar kushtet e vështira të infrastrukturës së teatrit të vjetër dhe se për shkak të kohëve dhe premtimeve të pa mbajtura u pajtuan me një realitet që i përkonte asaj kohe.
Ndërsa Drejtori i Teatrit Kombëtar, Altin Basha tha se ka qenë dëshmitar i përpjekjeve të vazhdueshme të trupës së Teatrit Kombëtar, të cilët, siç theksoi ai, tek ajo godinë nuk gjenin mjetet për të bërë artin e tyre.
Po ashtu, të pranishëm ishin dhe artistë të tjerë si Dritan Boriçi, Gaz Paja, Lulzim Zeqja, Arben Derhemi dhe Indrit Çobani.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
