Gazeta Si - Protesta e Partisë Demokratike ka nisur me një incident, ku një i ri ka goditur kreun e PD-së, Sali Berisha.
Ish-kryeministri është gjakosur në fytyrë ps goditjes, por pasi është qetësuar dhe ka marrë veten, ka vijuar marshimin drejt podiumit të protestës, pranë urës së ish-Hotel "Dajtit".
Personi që ka goditur me grusht kreun e PD quhet Gert Shehu, 31 vjeç, i cili dyshohet se vuan nga probleme të ankthit dhe epresionit.
Autori menjëherë pas sulmit është qëlluar dhe gjakosur me grushte dhe shkelma nga truprojat dhe mbështetësit e Berishës.
Pasi është neutralizuar, Gert Shehu është marrë menjëherë për në selinë blu i shoqëruar nga truprojat e Berishës. Aty ka mbërritur edhe një ambulancë. Më pas ka ardhur policia të cilët kanë arrestuar agresorin. Por duke parë se kishte hematoma në trup, ambulanca e dërgoi në Spitalin e Traumës.
Me shenja në fytyrë, Berisha iu drejtua protestuesve “ Poshtë Edi Rama, nuk na mposht asgjë! Rroftë Opozita Shqiptare! Kundër regjimit të kriminelëve! Nder Përjetë protestuesve!”.
Pas tij, fjalën e mori aktori Neritan Liçaj, pjesë e protestës së PD-së. Përpos gomones që simbolizon largimin e shqiptarëve drejt Britanisë së Madhe, në protestën e opozitës është shfaqur edhe një kortezh grash me të zeza.
Opozita e ka quajtur si “Kortezhi i dhimbjes shqiptare” ndërsa janë ngritur në podium edhe duke kënduar një këngë vaji.
Partia Demokratike ka vijuar protestën paralelisht me samitin e BE-së në Tiranë, ndonëse autoritetet nuk i dhanë një leje të tillë.
Sali Berisha shoqëruar nga kreu i Partisë së Lirisë, Ilir Meta, dhe protestuesit demokratë nisi marshimin nga selia e PD-së drejt zonës së ish-hotel Dajtit, në pamundësi për të penetruar drejt bulevardit “Dëshmorët e Kombit”, ku ishte planifikuar fillimisht.
Pankartat e protestuesve duket të “kërkojnë” vëmendjen e BE-së, ku në njërën shkruhet “Europe throw us a life vest”, “Europë na hidh një jelek shpëtimi”.
Në podiumin lëvizëse duket e shkruar “Europa the right way, not the Rama way”, “Europa është rruga e duhur, jo ajo e Ramës”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
