Nga ‘xhaxhai’ i Europës në ‘shokun e ngushtë’ të Trump: Orban po ngrihet dhe po shtrin fuqinë në Ballkan

Nga Gazeta ‘Si’ – Budapesti ka hapur një fushë të re konflikti me Bashkimin Europian kur kohët e fundit ka lehtësuar kërkesat për rusët dhe bjellorusët për të marrë Kartën Kombëtare të Hungarisë. Leja e qëndrimit i lejon ata jo vetëm të hyjnë në Hungari, por edhe në zonën Shengen.

Ndryshimi është pjesë e një procesi të gjatë, dinamika e të cilit i ka shpëtuar Polonisë si dhe mbarë BE-së. Europa tenton ta trajtojë kryeministrin hungarez Viktor Orbán si një ‘xhaxha të paparashikueshëm’, por në fund të fundit jo kërcënues, i cili gjithmonë shkakton rrëmujë në tryezën e darkës.

Ideja se gjithmonë mund të arrish një marrëveshje me Orbanin dëgjohet shpesh në Bruksel.

Nëse Trump rizgjidhet…

Por tani, Orbán po tund varkën europiane me shumë forcë. Oreksi i tij politik është i pazbutur. Dhe roli i tij si xhaxhai figurativ që shfaqet ndonjëherë në Bruksel, për t’u zhdukur sërish në skajet e BE-së nuk i mjafton më.

Turneu i tij i fundit në Kiev, Moskë dhe Pekin tregoi se ai dëshiron të ndjekë politikën e tij të jashtme, e cila nuk është në përputhje me interesat e BE-së. Në Parlamentin Europian, ai ngriti fraksionin e tij, i cili tani është blloku i tretë më i madh.

Nëse ish-presidenti i SHBA-së, Donald Trump zgjidhet në nëntor, Orbán do të ngrihet në gradën e ambasadorit më të lartë të BE-së në Shtetet e Bashkuara.

Ndërtimi i fuqisë në Ballkan

Për më tepër, falë oligarkëve dhe familjes së tij, Orbán ka ndërtuar një rrjet të gjerë lidhjesh biznesi në Ballkan gjatë viteve të fundit.

Struktura është e ngjashme me atë të përdorur nga Rusia dhe Kina: qeveria transferon para tek firmat private, të cilat i përdorin për të kryer punë biznesi, në dukje të pavarura nga shteti. Biznesmenët hungarezë blejnë kompani në Serbi , Mal të Zi dhe Bosnje-Hercegovinë, duke forcuar jo vetëm lidhjet ekonomike, por edhe politike me ato vende.

Orbán flet sinqerisht për këtë, duke thënë se “Brukseli e ka lënë Ballkanin në fatin e vet, sepse Ukraina ka nevojë për para”. Ai po përpiqet të mbushë boshllëkun dhe të ndërtojë pushtet aty ku BE-ja ose nuk i sheh interesat e veta ose nuk është në gjendje t’i ndjekë ato.

Prandaj, pushteti i Orbanit bazohet në dy shtylla: politikë dhe biznes. Nuk është ende e qartë se deri në çfarë mase kjo fuqi ekziston vetëm në letër.

Situata e vështirë ekonomike e Hungarisë nuk e ndryshon faktin që Orbán po luan një lojë të madhe. Në lojë nuk është vetëm e ardhmja e Hungarisë, por edhe fitorja e të menduarit që hap derën e Rusisë drejt Europës, edhe pa Kartën Kombëtare.

Burimi: World Crunch/ Përshtati: Gazeta Si