.png)
Nga Gazeta Si – Operacioni “Rising Lion” i Izraelit përfshinte përdorimin e më shumë se 200 avionëve luftarakë dhe më shumë se 100 dronëve për të goditur më shumë se 100 objektiva në të gjithë Iranin të premten në mëngjes.
Izraeli ka shpallur gjendje të jashtëzakonshme në pritje të sulmeve me raketa dhe dronë nga Teherani.
Udhëheqësit më të lartë europianë dhe botërorë kanë reaguar me shqetësim të thellë dhe kanë bërë thirrje për shmangien e përshkallëzimit të mëtejshëm të konfliktit
Presidentja e Komisionit Europian, Ursula von der Leyen, e cilësoi situatën si “thellësisht alarmante” dhe theksoi nevojën për përmbajtje maksimale nga të gjitha palët. “Europa i bën thirrje të gjitha palëve të përmbahen, të de-përshkallëzojnë menjëherë dhe të shmangin çdo lloj hakmarrjeje. Një zgjidhje diplomatike është më urgjente se kurrë, për hir të stabilitetit të rajonit dhe sigurisë globale”, shkroi ajo në rrjetet sociale.
Kancelari gjerman Friedrich Merz u shpreh se është njoftuar personalisht nga kryeministri izraelit Benjamin Netanyahu për operacionin ushtarak. Ai u bëri thirrje të dyja palëve të mos ndërmarrin hapa që mund të çojnë në destabilizimin e mëtejshëm të rajonit. “Gjermania është e gatshme të përdorë të gjitha mjetet diplomatike në dispozicion për të ndikuar në palët e konfliktit”, deklaroi ai.
Merz theksoi gjithashtu se objektivi kryesor duhet të mbetet parandalimi i Iranit nga zhvillimi i armëve bërthamore.
“Kjo nuk është një luftë, është një operacion prerjeje koke dhe një operacion për të ndaluar programin bërthamor… i cili ka përparuar në një mënyrë shumë të rrezikshme kohët e fundit”, tha Joshua Zarka, ambasadori i Izraelit në Francë. Ne u detyruam ta ndalonim këtë program të rrezikshëm. Izraeli nuk e paralajmëroi Francën para sulmit të tij ndaj Iranit, sepse nuk është më një aleat aq i ngushtë sa ishte më parë”, tha ambasadori, duke shtuar se sulmet do të zgjasin me ditë, por jo me javë ose muaj.
“Lajmi për këto sulme është shqetësues dhe ne i nxisim të gjitha palët të tërhiqen dhe të ulin urgjentisht tensionet. Përshkallëzimi nuk i sjell dobi askujt në rajon”, tha kryeministri britanik Keir Starmer.
“Stabiliteti në Lindjen e Mesme duhet të jetë përparësi dhe ne po angazhojmë partnerë për të ulur tensionin. Tani është koha për moderim, qetësi dhe kthim në diplomaci”.
Ndërkohë, ministri i Jashtëm italian, Antonio Tajani tha se ka zhvilluar një bisedë telefonike me homologun izraelit, ku i ka kërkuar shmangie të përshkallëzimit. Ai shtoi se do të përsërisë të njëjtën kërkesë edhe gjatë bisedës me ministrin iranian më vonë gjatë ditës. “Do të këmbëngul për mbështetjen e rrugës diplomatike”, u shpreh Tajani.
“Sekretari i Përgjithshëm dënon çdo përshkallëzim ushtarak në Lindjen e Mesme”, tha një zëdhënës i Sekretarit të Përgjithshëm të Kombeve të Bashkuara António Guterres.
“Sekretari i Përgjithshëm u bën thirrje të dyja palëve të ushtrojnë vetëpërmbajtje maksimale dhe të shmangin me çdo kusht zhytjen në një konflikt më të thellë, një situatë që rajoni mezi mund ta përballojë.”
“Është e qartë se situata po evoluon me shpejtësi. Ky është një veprim i njëanshëm nga Izraeli. Prandaj mendoj se është thelbësore që shumë aleatë, përfshirë Shtetet e Bashkuara, të angazhohen në këtë kohë në uljen e tensioneve. E di që ata po e bëjnë këtë. Dhe mendoj se kjo është përparësia kryesore”, tha Sekretari i Përgjithshëm i NATO-s, Mark Rutte, në një konferencë për shtyp në Stokholm me kryeministrin suedez Ulf Kristersson.
Pekini dhe Moska ishin më të kujdesshme. “Kina kundërshton shkeljen e sovranitetit, sigurisë dhe integritetit territorial të Iranit, kundërshton intensifikimin e kontradiktave, zgjerimin e konflikteve dhe rritjen e papritur të temperaturës së situatës rajonale. Kina u bën thirrje të gjitha palëve të interesuara të bëjnë më shumë për të promovuar paqen dhe stabilitetin në rajon dhe për të shmangur përshkallëzimin e mëtejshëm të situatës së tensionuar. Kina është e gatshme të luajë një rol konstruktiv në lehtësimin e tensioneve”.
Rusia “është e shqetësuar dhe dënon përshkallëzimin e mprehtë të tensioneve midis Izraelit dhe Iranit”, u tha gazetarëve zëdhënësi i Kremlinit, Dmitry Peskov.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
