Nga inspektorë ndërtimi në baristë, si po zëvendësojnë robotët njeriun në Singapor

Pas përpjekjeve për të gjetur staf gjatë pandemisë, bizneset në Singapor janë drejtuar gjithnjë e më shumë në vendosjen e robotëve për të ndihmuar në kryerjen e një sërë detyrash të përditshme, ku deri pak vite më parë as që mendohej se të zëvendësonin njeriun.

Robotët po punojnë nga ‘inspektorë ndërtimi’, në biblioteka e deri te shërbimet nëpër bare e restorante.

Singapori mbështetet te punëtorët e huaj, por numri i tyre ra me 235,700 midis dhjetorit 2019 dhe shtatorit 2021, sipas autoriteteve vendase. Kufizimet e pandemisë kanë përshpejtuar “ritmin e adoptimit dhe automatizimit të teknologjisë” nga kompanitë.

Në një kantier ndërtimi në Singapor, një robot me katër këmbë i quajtur “Spot”, i ndërtuar nga kompania amerikane Boston Dynamics, skanon pjesët e baltës dhe zhavorrit për të kontrolluar përparimin e punës, me të dhënat e kthyera në dhomën e kontrollit të kompanisë së ndërtimit Gammon.

Menaxheri i përgjithshëm i Gammon, Michael O’Connell, tha se përdorimi i Spot kërkon vetëm një punonjës njerëzor në vend të dyve që më parë nevojiteshin për ta bërë punën manualisht.

“Zëvendësimi i nevojës për fuqi punëtore në vend me zgjidhje autonome po fiton terren”, tha për Reuters, O’Connell, i cili beson se mungesat e krahut të punës sa vijnë e do të thellohen.

Ndërkohë, Biblioteka Kombëtare e Singaporit ka prezantuar dy robotë që lexojnë raftet që mund të skanojnë etiketat në 100,000 libra, ose rreth 30 për qind të koleksionit të saj brenda një dite.

“Stafi nuk ka nevojë të lexojë numrat e kërkesave një nga një në raft dhe kjo redukton aspektet rutinë dhe intensive të punës”, tha Lee Yee Fuang, ndihmës drejtor në Bordin e Bibliotekës Kombëtare.

Singapori ka 605 robotë të instaluar për 10,000 punonjës në industrinë e prodhimit, numri i dytë më i lartë globalisht, pas 932 të Koresë së Jugut, sipas një raporti të vitit 2021 nga Federata Ndërkombëtare e Robotikës.

Robotët po përdoren gjithashtu për detyrat që përballen me klientët, me më shumë se 30 stacione metroje që do të kenë robotë që bëjnë kafe për udhëtarët.

Keith Tan, shefi ekzekutiv i Crown Digital, i cili krijoi robotin ‘barist’, tha se ai po ndihmonte në zgjidhjen e problemit më të madh të industrisë së ushqim dhe pijeve – gjetjen e stafit.

Megjithatë, shumë njerëz kërkojnë që shërbimet të mbeten njerëzore, pasi roboti u heq anën emocionale të ndërveprimit e komunikimit.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.