.png)
Duke nisur nga mbrëmja e të martës, 19 tetor, do të ketë një devijim të trafikut të qarkullimit të automjeteve për shkak të vijimit të punimeve në Unazën e Re. Më konkretisht, të gjithë ata që vijnë nga zona e Astirit, do të devijojnë në rrugicat paralele në zonën e Yzberishtit.
Autoriteti Rrugor Shqiptar ka publikuar hartën se si do të ndryshojë qarkullimi i automjeteve nga Unaza e Re dhe Yzberishti. Për të ndihmuar drejtuesit është vendosur edhe sinjalistika përkatëse.
Aty ku ndahen rrymat e trafikut për Unazë të Re dhe Yzberisht, automjetet që kanë për destinacion zonën e pallateve, do të devijojnë djathtas në rrugën paralele, me të cilën janë lidhur të gjitha rrugicat ekzistuese, si rruga “Mikel Maruli”, rruga “Aleksandri i Madh” dhe “Bulevardi Migjeni”.
Për shkak të punimeve që do të kryhen në këtë aks do të jetë i ndaluar parkimi i automjeteve.
Një pjesë e konsiderueshme e aksit nga sheshi “Shqiponja” drejt Pallatit me Shigjeta, është asfaltuar dhe sistemuar prej disa kohësh.
Me hapjen e qarkullimit të të gjitha daljeve në këtë zonë, pritet të lehtësohet lëvizja e automjeteve në hyrje të Tiranës. Ndërkohë, punimet në sheshin “Shqiponja”, deri në hapjen e plotë të tuneleve të tjera, pritet të përfundojë në mars të vitit 2022.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
