Nga Gazeta ‘Si’- Në protestën e organizuar para SPAK për kreun e PD Sali Berisha, i cili shkoi për të zbatuar masën “detyrim paraqitje”, pasi është nën akuzë për aferën e privatizimit të klubit “Partizani”, ishin një numër i vogël simpatizantësh.
Megjithatë, ajo që u vu re është se kësaj proteste nuk iu bashkua kreu i grupit Parlamentar të PD, Gazment Bardhi por edhe një pjesë tjetër e eksponentëve të PD.
Ndër deputetët që munguan në protestën e organizuar para SPAK ishin Jorida Tabaku, Agron Gjekmarkaj, Bledjon Nallbati, Xhelal Mziu, Saimir Korreshi, Dhurata Çupi, Flamur Hoxha, Helidon Bushati, Andia Ulliri etj.
Të pranishëm krah Berishës ishin sekretari i përgjithshëm i PD Flamur Noka si dhe Oerd Bylykbashi.
Gjithashtu mes deputetëve të tjerë të pranishëm në mbështetje të tij u vunë re Luan Baçi, Dash Sula, Asllan Dogjani, Ina Zhupa, Edi Paloka, Elda Hoti si edhe ish deputetët dhe anëtarët e Kryesisë Belind Këlliçi e Enno Bozdo.
PD u dërgoi më herët strukturave një njoftim përmes mesazheve në celular, ku iu kërkohej pjesëmarrja në protestë.
“Të dashur miq. Ditën e Hënë, në orën 9:30, të mobilizojmë të gjithë strukturat e degëve për të protestuar përpara SKAP- it, si vegël në duart e Ramës për të përndjekur kundërshtarët politik. Do jemi aty në mbështetje të të drejtës, të ligjit dhe të vërtetës, që është në anën e kryetarit të PD, Prof. Dr. Sali Berisha. Në orën 9:30 përpara selisë së SKAP-it. Faleminderit!”, thuhej në njoftimin e PD drejtuar strukturave.
Në fjalën e tij Berisha sulmoi sërish SPAK-un ndërsa shtoi se prokurorët kërkuan rikthimin e tij me “arrest shtëpie”, pasi “kanë frikë nga e vërteta”.
Ai tha se kreu i SPAK Altin Dumani “fle mbi dosjet e krimit”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
