.png)
Gazeta Si - Nuk është hera e parë që një president amerikan vihet në shënjestër të qytetarëve të tij. Donald Trump, i plagosur gjatë një mitingu në Pensilvani, është vetëm i fundit në listë. Dhe në katër raste, nga 46 shefat e Shtëpisë së Bardhë, ka pasur edhe vrasje.
I pari ishte Abraham Lincoln në vitin 1865, pastaj radha ishte e James Garfield në 1881, i ndjekur nga William McKinley në vitin 1901.
Por ajo që e tronditi më shumë Amerikën, ishte sigurisht vrasja e John Kennedy më 22 nëntor 1963, ndërsa ai po kalonte me delegacionin presidencial në Dealey Plaza në Dallas, Teksas.
Jfk, krimi më i tmerrshëm - Një krim që shuajti shpresat për një botë ndryshe, duke u kthyer në një "mister të pafund", është atentati më i hetuar i shekullit, ende i mbështjellë me teori të shumta konspirative në kontrast me përfundimin zyrtar se vrasja e presidentit të 35-të të Shteteve të Bashkuara Shtetet u krye vetëm nga Lee Harvey Oswald. As deklasifikimi i fundit i pothuajse të gjitha dokumenteve nuk i ka shuar plotësisht dyshimet.
Plagosja e vëllait të tij Bob- Pesë vjet më vonë, më 5 qershor 1968, ndodhi edhe me vëllain e tij, Robert Francis Kennedy në mes të një fushate presidenciale.
Ai u qëllua me armë pas një mitingu në sallën e hotelit “Ambassador” në Los Anxhelos.
Senatori i atëhershëm kaloi nëpër kuzhinë, si një rrugë të shkurtër për në dhomën e shtypit dhe u qëllua tre herë nga Sirhan Sirhan, një palestinez 24-vjeçar, i cili qëlloi me një psitoletë të kalibrit 22. Pesë persona të tjerë u plagosën.
Ronald Reagan u qëllua në rrugë - Më 30 mars 1981, pak më shumë se dy muaj nga mandati i tij presidencial, ishte radha e Ronald Reagan: ai po largohej nga hoteli “Hilton” në Uashington, ku kishte folur me 5000 anëtarë të sindikatës së AFL, kur një burrë i çmendur, John Hinckley Jr, qëlloi drejt presidentit të ri, duke ia shpuar mushkërinë e majtë me një plumb.
Reagan u plagos kur një nga plumbat doli me rikoshet nga limuzina, duke e goditur atë në sqetull pranë mushkërisë.
Sekretari i shtypit James Brady, agjenti i Shërbimit Sekret Timothy McCarthy dhe polici Tomas Delahanty u qëlluan gjithashtu në sulm. Plagosja e Reganit nuk u vu re, derisa nisi t’i dilte gjak në kostumin e veshur.
Reagan rrezikoi vdekjen - Ai u dërgua më pas në Spitalin Universitar “George Washington” dhe iu nënshtrua një operacioni.
Sipas mjekëve, ai rrezikoi të vdiste gjatë operacionit. Para se të futej nën thikë, Reagan madje gjeti forcën të bënte shaka me ekipin mjekësor: "Shpresoj që të gjithë të jeni republikanë".
Ai doli nga spitali rreth dhjetë ditë më vonë. Hinckley Jr u akuzua për tentativë vrasjeje, por u shpall i pafajshëm për shkak të paaftësisë mendore. Ai u lirua dy vjet më parë nga St. Elizabeth's Asylum for Criminally Insane në Uashington.
Autori tha në atë kohë se donte të vriste Reganin për t'i bërë përshtypje aktores Jodie Foster, me të cilën ishte fiksuar, pasi e kishte parë në filmin ikonë të Hollivudit, "Taxi Driver".
Të tjerë - Presidentë të tjerë amerikanë u kanë shpëtuar për pak tentativave për vrasje: Franklin Delano Roosevelt, Harry Truman, Theodore Roosevelt dhe Gerald Ford.
Presidenti Andrew Jackson, në epokën e para Luftës Civile u qëllua teksa merrte pjesë në një funeral në Kapitol. Sulmuesi qëlloi dy herë, por arma i ngeci.
Presidenti Theodore Roosevelt, ashtu si Trump po përpiqej të kthente punën e tij të vjetër gjatë fushatës së vitit 1912. Ai u qëllua gjatë rrugës për një fjalim në Milwaukee.
Presidenti Franklin D. Roosevelt, ishte president i zgjedhur, kur një vrasës qëlloi ndaj tij në Miami në vitin 1933. Sulmuesi, Guiseppe Zangara, nuk e vrau dot Roosevelt, por i mori jetën kryebashkiakut të Çikagos, Anton Cermak.
Presidenti Harry Truman mori presidencën, pasi Roosevelt vdiq dhe u qëllua përballë Shtëpisë së Bardhë nga nacionalistët portorikanë në viitn 1950. Presidenti Gerald Ford u përball me dy tentativa për vrasje me radhë në vitin 1975.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
