Nga Gazeta Si – Netflix po mendon të prezantojë një abonim më të lirë se ata aktualët. Ai do të mbështetet pjesërisht nga reklamat, për të nxitur më shumë njerëz të regjistrohen. Platforma humbi shumë abonentë për herë të parë në më shumë se dhjetë vjet. Sëbashku me të dhëna të tjera pak premtuese, kjo çoi në humbjen e aksioneve të kompanisë amerikane të transmetimit deri në 25 për qind të vlerës së tyre në tregjet në SHBA.
Në komunikimin periodik dhe analizën e të dhënave ekonomike, Netflix tha se mbylli tremujorin e parë të vitit 2022 me rreth 200 mijë abonentë më pak se sa kishte në tre muajt e mëparshëm. Kompania njoftoi gjithashtu se nuk ishte në gjendje të shtonte 2.5 milionë abonentë të pritshëm në të njëjtën periudhë. Gjithashtu kopmania parashikon një ulje të mëtejshme të numrit të abonentëve në tremujorin aktual, duke vlerësuar të paktën 2 milionë abonentë më pak.
Për vite me radhë Netflix ka qenë pikë referimi për të kuptuar se si po lëvizte industria e shërbimeve të transmetimit, si për numrin e madh të abonentëve të tij, ashtu edhe për sasinë e madhe të prodhimeve dhe investimeve. Vetëm këtë vit, kompania pret të shpenzojë deri në 20 miliardë dollarë për të prodhuar seriale televizive dhe filma. Vështirësitë e muajve të fundit vërehen me shumë vëmendje nga platforma të tjera të mëdha, duke filluar nga Disney, shërbimi i transmetimit të së cilës në thuajse dy vjet ka pasur suksese të rëndësishme.
Netflix beson se një nga shkaqet në uljen e rritjes së tyre lidhet me ndarjen e fjalëkalimeve për të hyrë në shërbimet e tyre, me njerëz të ndryshëm që përdorin të njëjtën llogari për të kursyer para. Sipas kompanisë, përveç 222 milionë abonentëve, shërbimi përdoret nga të paktën 100 milionë njerëz ose familje të tjera, një e treta e të cilëve janë në Shtetet e Bashkuara dhe Kanada.
Prandaj mund të ketë kufij të rëndësishëm për rikuperimin e abonimeve të reja, futjen e kontrolleve më të mëdha në sistemet e aksesit dhe njëkohësisht ofrimin e një opsioni abonimi që lejon që fjalëkalimi të ndahet midis një numri të caktuar njerëzish. Aktualisht, përdorimi i llogarive duhet të kufizohet në një bërthamë të vetme përdoruesish, të cilët, në varësi të llojit të abonimit, mund të shikojnë njëkohësisht përmbajtjen në pajisje të ndryshme përmes profileve të tyre.
Në të kaluarën, ndarja e fjalëkalimeve tolerohej, edhe nëse nuk lejohej formalisht, sepse Netflix ishte i interesuar të arrinte sa më shumë njerëz, në mënyrë që të bënte të njohura shërbimet e tyre dhe në këtë mënyrë të fitonte abonentë të rinj. Në një fazë të rritjes së madhe të përdoruesve, ndarja e së njëjtës llogari ishte një problem margjinal, ndërkohë që bëhet qendror në një fazë si kjo e tanishme në të cilën kompania lufton të mbajë abonentë dhe të bindë njerëz të rinj që të regjistrohen në shërbimet e saj.
Ngadalësimi i abonimeve të reja ka çuar në një rënie të rritjes së të ardhurave, pas viteve të rritjes së raportimit të Netflix me rreth 20 për qind çdo tremujor. Në tre muajt e parë të këtij viti, të ardhurat u rritën me 10 për qind, duke arritur në 7.87 miliardë dollarë kundrejt 7.93 miliardë dollarëve të parashikuar fillimisht. Fitimet ishin 1.6 miliardë dollarë, nga 1.71 miliardë dollarë në të njëjtën periudhë të një viti më parë.
Të ardhurat dhe fitimet më të ulëta erdhën kryesisht nga ulja e abonimeve. Netflix aktualisht ka 221.6 milionë abonentë, nga 221.8 milionë në tremujorin e mëparshëm. Kompania humbi 700,000 abonentë në Rusi, ku pezulloi operacionet e saj pas pushtimit ushtarak rus të Ukrainës dhe humbi rreth një milion në Amerikë. Përdoruesit e rinj që u regjistruan në tremujorin e fundit nuk ishin të mjaftueshëm për të kompensuar humbjen e abonentëve, duke çuar në një ulje të përgjithshme prej 200,000 abonentësh.
Ulja e abonentëve u ndikua edhe nga zgjedhja e Netflix për të rritur çmimet e abonimeve të tij, me rritje për opsionet më të përdorura nga përdoruesit duke filluar nga janari i kaluar. Kompania nuk kishte rishikuar çmimet e saj për gati dy vjet dhe pas rritjeve, shumë kanë preferuar të braktisin shërbimin, ndoshta duke shkuar drejt platformave të tjera të transmetimit që kushtojnë më pak.
Pas vitesh që nuk ka pasur shumë konkurrencë, Netflix tani po kalon në një treg shumë më të larmishëm me shumë konkurrentë mjaft të ashpër, të cilët në disa raste mund të përballojnë t’u kërkojnë klientëve të tyre çmime më të ulëta. Disney + ka disa kohë që ofron abonimin e tij në promocion me disa euro për muajt e parë, ndërsa në Shtetet e Bashkuara shërbime të tjera si Hulu ofrojnë një katalog mjaft të pasur, por me çmime të ulëta nëse përdorni opsionin me reklamat.
Në të kaluarën, drejtuesit e Netflix kishin thënë gjithmonë se ishin kundër planeve të abonimit me reklama, por duke pasur parasysh tendencat më të fundit, ata tani po rishikojnë mundësinë e ofrimit të një abonimi më të lirë të mbështetur pjesërisht nga reklamat. Në këtë mënyrë, kompania mund të stimulojë abonime të reja, veçanërisht në vendet ekonomikisht më pak të përparuara, ku prej disa kohësh kompania ka thënë se sheh mundësi të mëdha rritjeje për të kompensuar vështirësitë në Shtetet e Bashkuara dhe pjesërisht në Europë.
Netflix shpenzon më shumë se platformat e tjera për zhvillimin dhe prodhimin e një sasie të madhe serialesh televizive dhe filmash, disa prej të cilëve janë bërë hite të mëdhenj si “Stranger Things”, “The Croën” dhe “Bridgerton”, ndërsa të tjerët kanë pasur më pak fat si “Space Force”. Së fundmi, kompania ka arritur suksese të rëndësishme edhe me produksione jashtë Shteteve të Bashkuara, si në rastin e serialit të Koresë së Jugut “Squid Game”, një nga më të njohurit dhe më të diskutuarit vitin e kaluar.
Pandemia e koronavirusit kishte favorizuar një rritje të abonimeve në Netflix në vitin 2020, në një kohë kur lloje të ndryshme izolimesh ishin në fuqi në shumë vende, me kërkesën që popullsia të qëndronte sa më shumë në shtëpi për të reduktuar përhapjen e infeksioneve. Netflix, ashtu si platformat e tjera, kishte zbuluar një rritje të orëve të shpenzuara në aplikacionet e tij, megjithëse vitin e ardhshëm kishte filluar të regjistronte të dhëna më pak inkurajuese për fuqinë e abonimeve të reja.
Në përgjithësi, Netflix ka ende një bazë solide financiare dhe potencial të mirë për të vazhduar zgjerimin jashtë Shteteve të Bashkuara. Në tremujorin e fundit, prania e saj u rrit në Japoni dhe në tregje të rëndësishme orientale si Tajlanda, Tajvani dhe Filipinet.
Marrë nga Il Post, përshtati në shqip Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
