Netanyahu po përgatit planin e armëpushimit në Liban si ‘dhuratë’ për Trump

Nga Gazeta 'Si'- Zgjedhjet presidenciale të 5 nëntorit që shpallën fitues republikanin, Donald Trump, duket se do të kenë një ndikim thelbësor në politikën ndërkombëtare përfshirë këtu luftën në Ukrainë dhe konfliktin e përgjakshëm në Gaza dhe jo vetëm.

“Washington Post” ka bërë një analizë rreth vendimeve që pritet të marrë kryeministri Izraelit lidhur me sulmet në Liban, i ndikuar nga zgjedhja e presidentit të ri amerikan.

Izraeli po lëviz me shpejtësi për të arritur një marrëveshje armëpushimi në Liban, duke kërkuar t’i japë Donald Trumpit një fitore të hershme diplomatike ndërsa ai përgatitet të marrë presidencën e SHBA në janar të 2025, raporton Washington Post.

Sipas zyrtarit izraelit, Ron Dermer, ministri izraelit i çështjeve strategjike, diskutoi planin me Trump dhe dhëndrin e tij, Jared Kushner, gjatë një takimi në Mar-a-Lago përpara se të informonte zyrtarët e administratës Biden.

Këto konsultime nxjerrin në pah zhvendosjen e qendrës politike në SHBA pas fitores së Trumpit në zgjedhje. Në qendër është një plan që kërkon tërheqjen e luftëtarëve të Hezbollahut në veri të lumit Litani, duke krijuar një zonë kontrolli nën vëzhgimin e ushtrisë libaneze për 60 ditë, me mbështetjen e SHBA dhe Britanisë.

Zyrtarët nga Izraeli dhe SHBA kanë thënë se Rusia mund të luajë një rol kyç për të siguruar që Hezbollahu të mos riarmatoset përmes rrugëve siriane. Diskutimet përfshijnë gjithashtu rolin e mundshëm të Jared Kushner në negociatat e ardhshme për normalizimin e marrëdhënieve Izrael-Saudi.

Reagimet e Hezbollahut dhe Libanit

Një zëdhënës i Hezbollahut tha se organizata është e hapur për një armëpushim të përkohshëm, me kusht që Izraeli të mos kryejë operacione ushtarake në tokën libaneze.

Megjithatë, kryetari i parlamentit libanez, Nabih Berri, theksoi se “askush nuk do të pranojë një marrëveshje që u shërben interesave izraelite në kurriz të sovranitetit të Libanit”.

Lufta pas negociatave

Izraeli, mes operacioneve të vazhdueshme ushtarake, synon të ruajë fuqinë ushtarake në rajon në rast të shkeljes së armëpushimit. Që nga tetori 2023, përleshjet me Hezbollahun kanë vrarë 45 civilë izraelitë dhe 31 ushtarë, ndërsa më shumë se 60.000 njerëz janë larguar nga shtëpitë e tyre në Izraelin verior.

Një poster i Hasan Nasrallah, liderit të vdekur të Hezbollahut, mbi një zonë tregu në Nabatieh, Liban, që është goditur nga sulmet ajrore të shumta izraelite.

Në Liban, kriza humanitare thellohet, me më shumë se 900.000 të zhvendosur dhe 3.300 të vdekur, sipas Ministrisë së Shëndetësisë të vendit. Pavarësisht përplasjeve, zyrtarët izraelitë besojnë se Hezbollahu është dobësuar, duke krijuar kushte të favorshme për kompromis.

Roli dhe perspektivat e Rusisë për Trump

Përfshirja e Rusisë në plan e ndërlikon më tej ekuilibrin diplomatik, pasi Moska ka lidhje të ngushta me Hezbollahun dhe Teheranin. Ndërsa Rusia thuhet se mbështet çarmatosjen e Hezbollahut, zbatimi i planit nën administratën aktuale të Biden duket i pamundur. Megjithatë, nëse Trump merr presidencën, analistët parashikojnë se roli i Rusisë do të rritet.

Strategjia politike e Netanyahut fokusohet në menaxhimin e ditës së nesërme, duke synuar të përfitojë si nga mbështetja e Trump ashtu edhe nga momenti i diplomacisë ndërkombëtare. Javët e ardhshme priten të jenë kritike për zhvillimin e bisedimeve dhe operacioneve ushtarake në rajon.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.