Në Muzeun Prado të Madridit mund të nuhasësh një pikturë

Nga e hëna e 4 prillit deri më 3 korrikun e ardhshëm, Muzeu Prado në Madrid, Spanjë, ka hapur ekspozitën e nuhatjes “La esencia de un cuadro. Një ekspozim nuhatës”. Nuk është një ekspozitë e zakonshme e arteve pamore apo skenike, por ajo rikrijon disa aroma që do të dilnin, nëse do të ishin të vërteta, bimë dhe objekte të “Shqisës së nuhatjes”, një pikturë e bërë nga piktorët flamandë Jan Brueghel Plaku dhe Peter Paul Rubens midis viteve 1617 dhe 1618. 10 aromat, të krijuara me qëllim nga disa elementë të pranishëm në pikturë, mund të nuhaten duke aktivizuar shpërndarësit në dhomën e muzeut. Shoqërimi i shikimit dhe nuhatjes për të përforcuar përvojën e një vepre arti është një eksperiment kurioz dhe i pazakontë.

“Shqisa e nuhatjes” është një vaj në panel që është pjesë e bashkëpunimeve midis Brueghel Plakut, një piktor flamand që jetoi nga 1568 deri në 1625, dhe Rubens-it, bashkëkohësit të tij më të famshëm. I përket një serie alegorish kushtuar pesë shqisave në të cilat Rubens ishte përfshirë në krijimin e personazheve. Piktura është vendosur në një kopsht idilik dhe përshkruan një fëmijë në gjestin e dorëzimit të një tufe me lule tek një figurë e zhveshur femre – me sa duket perëndeshës Venus – e cila nuhat buqetën e vogël me lule që mban në dorë.

Vepra është plot detaje: përmban më shumë se 80 lloje lulesh dhe bimësh, kafshë të shumta dhe shumë objekte, duke përfshirë amforat dhe mjetet për mbledhjen e esencave. Ideja e Alejandro Vergara, kuratori i seksionit të pikturave flamande të muzeut, ishte të jepte të paktën një pjesë të sasisë së aromave të ngjallura nga vepra. Kjo është arsyeja pse ai ia besoi krijimin e 10 aromave Gregorio Sola, ekspert i kompanisë katalanase të parfumeve Puig.

Sola shpjegoi se falë një teknologjie të quajtur AirParfum, e zhvilluar ekskluzivisht nga Puig, u përftuan aromat e shtatë luleve.

Duke ndërthurur aroma dhe esenca të ndryshme, më pas u rikrijuan aromat e elementëve të tjerë të pranishëm në pikturë.

Sipas Vergara, kjo ekspozitë “e pazakontë dhe novatore” ka një objektiv të dyfishtë: të rikrijojë aromat e së kaluarës dhe të përmirësojë punën e Brueghel, një piktori të cilit shumë vizitorë nuk i kushtojnë shumë vëmendje, edhe për shkak se veprat e tij janë mjaft të vogla.

Në vitin 2019 parfumeria Folie À Plusieurs krijoi dy aroma për të dhënë idenë e një vizite në Muzeun e Ri të artit bashkëkohor në Nju Jork. Në të njëjtin vit, parfumeria Officine Universelle Buly në Paris krijoi tetë aroma të frymëzuara nga kryeveprat e mbajtura në muzeun e Luvrit, i cili shet gjithashtu kartolina dhe postera me parfum.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.