Sigurimet vullnetare po mbajnë një peshë më të lartë në tregun e sigurimeve sipas të dhënave të Autoritetit të Mbikëqyrjes Financiare (AMF) që tregojnë se për 6-mujorin 2021 sigurimet vullnetare sollën 37.9% të primeve të shkruara bruto në tregun e jo-jetës, nga 35.4% që ishte pesha e tyre një vit më parë.
Ky është niveli më i lartë që sigurimet vullnetare arrijnë në strukturën e primeve për të paktën pesë vitet e fundit.
Për gjashtë muajt e parë të këtij viti, shqiptarët paguan rreth 3.1 miliardë lekë për sigurime vullnetare, 24% më shumë krahasuar me të njëjtën periudhë të një viti më parë. Rritja e peshës së tyre ka ardhur sidomos nga sigurimi i pronave nga katastrofat, sigurimi KASKO i automjeteve, sigurimi i aksidenteve dhe sigurimi i përgjegjësive civile.
Nga tetë kompani të sigurimit të jo-jetës, vetëm dy prej kanë një dominim të sigurimeve vullnetare në strukturën e primeve. Për Albsig, sigurimet vullnetare sjellin 58% të primeve të shkruara bruto, ndërsa për Sigal Uniqa Group Austria 51% të tyre.
Për kompanitë e tjera, pjesa e sigurimeve vullnetare është dukshëm më e ulët dhe qëndron në intervalin mes 18% dhe 27% të primeve të shkruara bruto.
Pavarësisht rritjes së lehtë në peshën specifike të sigurimeve vullnetare, tregu i sigurimeve në Shqipëri ngelet i dominuar nga sigurimet e detyrueshme motorike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
