.png)
Pasojat e ndryshimeve klimatike dhe ndotjes së ajrit mund të shkaktojnë deri në 30 milionë vdekje në vit deri në vitin 2100, sipas një studimi të realizuar nga Instituti për Kimi, Max Planck në Gjermani.
Deri tek ky përfundim shqetësues është arritur duke përdorur simulime numerike moderne për të vlerësuar vdekshmërinë e shkaktuar nga temperaturat ekstreme dhe ndotja e ajrit.
Sipas udhëheqësit të studimit, Andrea Pozer, rreth 1.6 milionë njerëz vdesin çdo vit në fillim të këtij shekulli si pasojë e të nxehtit ose të ftohtit ekstrem.
Ky numër pritet të rritet shtatëfish deri në fund të shekullit, duke arritur në 10.8 milionë vdekje. Ndërkohë, ndotja e ajrit, e cila shkaktonte 4.1 milionë vdekje çdo vit në fillim të shekullit, mund të arrijë në 19.6 milionë vdekje vjetore deri në fund të shekullit.
Studimi është publikuar pak pas një raporti të OKB-së që paralajmëron për një rritje katastrofike të temperaturës globale prej 3.1 gradë Celsius gjatë këtij shekulli.
Projekti ka analizuar periudhën nga viti 2000 deri në 2090, duke përfshirë intervale dhjetëvjeçare.
Rezultatet tregojnë se numri i vdekjeve do të ndryshojë ndjeshëm në varësi të rajonit. Azia Jugore dhe Lindore pritet të preken më rëndë, për shkak të popullsisë së moshuar dhe ndotjes ekstreme të ajrit.
Në vendet me të ardhura të larta, si Europa Perëndimore, Amerika e Veriut, Australia dhe rajonet e Paqësorit, vdekjet nga temperaturat ekstreme do të jenë më të larta sesa ato nga ndotja e ajrit.
Vendet si SHBA-ja, Anglia, Franca, Japonia dhe Zelanda e Re tashmë po përjetojnë këtë trend. Ekspertët paralajmërojnë se rreziku nga temperaturat ekstreme do të rritet, duke prekur gjithashtu vende si Polonia, Rumania dhe disa pjesë të Amerikës së Jugut.
Burimi: YahooNews
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
