Ashtu sikurse pritej, lista e Kombëtares për tri ndeshjet me Kosovën, Kazakistanin dhe Bjellorusinë, ka pësuar ndryshime që në ditën e parë të grumbullimit. Në pritje të kompletimit të grupit, trajneri Reja ka mësuar se mbrojtësi Lorenc Trashi nuk do të jetë i disponueshëm për këto ndeshje, pasi nuk e lejojnë masat kufizuese në Kuvajt, ku ai luan.
Marash Kumbulla mbetet në dyshim të fortë, sepse lojtarët e Romës duhet të qëndrojnë në karantinë, ndërsa Dermaku dhe Mihaj janë të dëmtuar. Kjo situatë ka bërë që të thirren në Kombëtare dy lojtarët e Tiranës, Erion Hoxhallari dhe Marsel Ismajlgeci. Të dy janë mëngjarashë dhe i janë bashkuar skuadrës në Durrës, duke u vënë nën urdhrat e trajnerit Reja. Sulmuesi Vrioni është i dëmtuar dhe do të mungojë, ndërsa Gjasula pritet të bashkohet me Kombëtaren pas miqësores me Kosovën, që zhvillohet të mërkurën në “Elbasan Arena”.
Më 15 dhe 18 nëntor luhen dy ndeshjet e fundit në Ligën e Kombeve ndaj Kazakistanit dhe Bjellorusisë, të dyja në “Air Albania”, ku kyqezinjtë do të synojnë 6 pikët për ta mbyllur në vend të parë. Trajneri Reja i frikësohet faktit se lista e mungesave mund të bëhet më e gjatë. Italiani nuk ka të gatshëm as portierin Strakosha, si dhe mesfushorët Bare dhe Roshi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
