Rezultati i ndeshjes Totenhem-Mançester Junajtid, 0-3, i ka dhënë një shtysë të fortë merkatos së trajnerëve. Ole Gunar Solskjaer ka fituar kohë dhe pret më i qetë ndeshjet me Atalantën dhe Mançester Sitin, kurse Nuno Espirito Santo është shkarkuar nga Totenhemi, që ka pësuar disa humbje dhe mban vendin e 8-të në Premier Ligë.
Dhe për të zëvendësuar portugezin, drejtuesit e Totenhemit kanë zgjedhur Antonio Konten, me të cilin kontaktet kanë avancuar dhe trajneri italian do të udhëtojë me një avion privat për në Londër shumë shpejt. Fabio Paratiçi ka punuar me Konten te Juventusi dhe e kërkoi që në verë. Këtë herë ish-trajneri i Interit është gati ta pranojë ofertën, pasi nuk dëshiron të qëndrojë më gjatë pushim.
Para se të firmosë, Konte ka kërkuar garanci për një projekt teknik dhe ekonomik të rëndësishëm. Po flitet për një kontratë për 1.5 vjet, me një pagë 15 milionë euro në sezon për trajnerin italian. Po ashtu, Konte ka kërkuar garanci për blerjen e 3-4 lojtarëve të rëndësishëm në merkaton e janarit për të forcuar skuadrën.
“E di mirë se sa Nuno dhe stafi i tij e dëshironin suksesin, ndaj më vjen keq që kemi marrë këtë vendim. Nuno është një xhentëllmen dhe duam ta falënderojmë atë dhe stafin e tij, duke iu uruar çdo të mirë në të ardhmen”, – ka thënë Paratiçi pas shkarkimit të trajnerit portugez. Me shumë mundësi, të martën Konte do të drejtojë seancën e parë stërvitore te skuadra e tij e re.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
