.png)
Nga Gazeta Si - Festivali Folklorik Kombëtar ka vijuar në natën e tij të tretë me grupet e qarkut të Tiranës dhe të Dibrës, si dhe grupin përfaqësues të shqiptarëve të Kosovës.
Në kalanë e Argjirosë ansambli “Tirana”, ky xhevahir i Tiranës, i përbërë nga artistë të rinj, përfaqësoi qarkun e Tiranës me fabulën “Rituali i jetës”, që flet për të gjitha proceset e jetës nga lindja në vdekje, duke marrë duartrokitje të ngrohta nga publiku.
Nga grupi folklorik i Tiranës nuk kanë munguar as këngët e vajit e ninullat për të vijuar më pas me vallet: si valle vënçe e burrave të malësisë, valle e Tombrës, valle dyshe e brezave, valle e pipëzave, valle e rrugës.
“Flakë e ndezi Tirona jonë sonte kalanë e Gjirokastrës”, shkruan koreografi Arian Sukniqi, pjesë e Ansamblit “Tirana”.
Ndërkohë, grupi i polifonisë së këtij ansambli do të përfaqësojë qarkun e Gjirokastrës me këngën lirike “Zërin nga gjyshërit e muarrëm” në datën 30 qershor.
Ansambli folklorik “Tirana” ka në repertorin e tij valle të trevave të ndryshme të Shqipërisë, valle nga Shqipëria e Mesme, valle nga Shqipëria e Jugut dhe valle nga Shqipëria e Veriut. Këta artistë mbajnë gjallë, ruajnë dhe kultivojnë muzikën popullore shqiptare, këngët dhe vallet tradicionale të Tiranës dhe Shqipërisë së Mesme dhe të Jugut.
Ndërsa, Dibra e nisi festivalin me ritin e jetës baritore të zonës së Kalasë së Dodës. Më pas, një valle dyshe burrash nën interpretimin e valltarëve Rakip Pashnjari dhe Gjuran Ilnica.
Motive folklorike nga Dibra paraqiti natën e parë të hapjes së festivalit edhe Ansambli Shtetëror i Këngëve dhe Valleve Popullore Shqiptare në Maqedoninë e Veriut. Në repertorin e këtij Ansambli ishin kënga “Fusha e Korabit”, “Këngë për Suf Xhelilin”, “Na këndojnë pushkët nëpër kulla” si dhe “Vallja e Dibrës”.
Festivali Folklorik Kombëtar 2023 nisi më 24 qershor në kalanë e qytetit të Gjirokastrës në një skenë të hapur për të gjithë dhe do të mbyllet më 1 korrik 2023.
Në këtë festival pritet të ngjiten në skenë mbi 1200 artistë nga të gjitha trevat shqiptare dhe diaspora.
Ministrja e Kulturës, Elva Margariti, tha në hapje të festivalit, se synohet që Festivali Folklorik i Gjirokastrës të regjistrohet në UNESCO.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
