.png)
Gazeta Si – “Nuk është Club Méditerranée”, – tha avokati Jean-Michel Darrois mbrëmjen e të martës, ndërsa doli nga burgu La Santé, pasi vizitoi klientin e tij Nicolas Sarkozy.
Ish-presidenti francez, kaloi natën e parë pas hekurave në burgun francez La Sante në Paris, i dënuar me 5 vjet për konspiracion.
“Ai luajt sport, filloi të shkruante librin e tij. Është në një qeli nëntë metra katrorë dhe është shumë e zhurmshme gjatë gjithë kohës”, – vijoi avokati, i cili shtoi se Sarkozy pati mundësi të takohej me gruan e tij, Carla Bruni për herë të parë pasdite, në një nga tre takimet njëorëshe në javë për të cilat ai ka të drejtë.
“Dita e parë në burg ishte e tmerrshme, por ai e ka kaluar atë”, përfundoi avokati. Një ditë që filloi në orën 9:37 të mëngjesit, kur makina tip “Renault Espace” e errët e Nicolas Sarkozy hyri në burgun Montparnasse, i vetmi që ekziston ende brenda mureve të Parisit. I mbipopulluar, burgu mban 1,237 të burgosur kur kapaciteti i tij maksimal është 657.
Ish-presidenti nuk po mbahet në seksionin “vulnerabël”, i cili më parë ka mbajtur personazhe të tjerë të famshëm, si Bernard Tapie, por në izolim, jo për shkak të një dënimi më të ashpër, por për t’u siguruar që ai të mos bjerë në kontakt me të burgosur të tjerë që mund të kërcënojnë sigurinë e tij.
Me të mbërritur, ai u prit nga britma – jo tamam miqësore – nga të burgosurit e tjerë, “Oh, mirë se erdhe Sarkozy!” dhe “Sarkozy është këtu!”
Atij iu dhanë rregullat e burgut dhe iu kujtua pse ishte në burg: për konspiracion kriminal në rastin e financimit libian të fushatës së tij zgjedhore të vitit 2007.
Rojet më pas i morën gjurmët e gishtërinjve dhe një foto dhe atij iu caktua një numër i të burgosurit, së bashku me një kartë identiteti të brendshme të burgut.
Sarkozy u detyrua të linte dokumentet e tjera dhe sendet personale në një kasafortë të vogël, por iu lejua të mbante unazën e martesës dhe të hiqte mjekrën.
Më pas, si çdo i burgosur tjetër, ai mori një “kit hyrjeje” me sapun, çarçafë, tenxhere dhe tiganë, letër dhe një stilolaps.
Ai u shoqërua në qelinë e tij, e cila ka një banjo me dush, një kuzhinë të vogël, një krevat, një tavolinë të vogël, një televizor të vogël dhe – telefonat celularë janë të ndaluar – një linjë telefonike fikse me 10 numra të paraautorizuar nga administrata e burgut, e cila mund të dëgjojë bisedat.
Me këshillën e avokatëve të tij, ish-presidenti solli disa bluza për ta mbrojtur nga të ftohtit dhe tapa veshësh.
Pjesa më e vështirë është nata, sepse rojet, veçanërisht në fazën fillestare të paraburgimit, i ndezin dritat çdo orë për të kontrolluar të burgosurin për tendenca vetëvrasëse dhe sepse është praktikë standarde që të burgosurit e tjerë të brohorasin emrin e të sapoardhurit gjatë gjithë natës së parë. Në fakt, edhe si ish-ministër i Brendshëm i Francës, Sarkozy nuk ka qenë kurrë i butë me kriminelët.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
