.png)
"Pa Portugalinë në kompeticion, ndihem i lidhur me Italinë, sepse, si trajner i Romës, kam lojtarë në atë kombëtare. I uroj më të mirat Leonardo Spinacolës, që po luan shumë mirë, si dhe Brajan Kristantes, që ka luajtur si zëvendësues".
Janë këto fjalët e Zhoze Mourinjos për “Times”, teksa komenton fazën finale të Euro 2020. "Italia kundër Anglisë në finale do të ishte skenari perfekt për mua, - ka deklaruar trajneri portugez. – Do të më pëlqente që Herri Kejn të merrte trofeun në duart e tij nga Aleksander Ceferin. Nëse mundin Gjermaninë, i shoh në “Wembley”, në finale". Në fundjavë Mourinjo pritet në Romë për të nisur zyrtarisht eksperiencën e tij në krye të skuadrës kryeqytetase.
Nga Euro 2020 janë larguar tashmë edhe kampionët e botës, me Kilian Mbape protagonist negativ te Franca. Sulmuesi francez nuk shënoi asnjë gol në 4 ndeshje dhe humbi penalltinë e fundit ndaj Zvicrës, duke përfunduar kështu në qendër të kritikave jo vetëm në vendin e tij.
Për t’i dhënë kurajë sulmuesit të ri ka menduar një legjendë, braziliani Pele, i cili i ka dedikuar një postim në Tuiter pas eliminimit të bujshëm të Francës. “Mbaje kokën lart Kilian! Nesër është dita e parë e udhëtimit tënd të ri", - shkruan Pele.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
