.png)
Gazeta Si- “Në Spanjë luftoj të jem i lumtur”. Alvaro Morata nuk e ka fshehur kurrë brishtësinë e tij emocionale. Me guxim ai ka pranuar gjithmonë vështirësitë e të jetuarit çdo ditë në skenë.
Ai ka qenë gjithmonë një lojtar i veçantë, ndryshe nga shumica e kolegëve të tij, më i prirur për të fshehur dobësitë, sikur kjo e bënte më të fortë.
Në një intervistë për spanjollen “El Mundo”, pak orë para gjysmëfinales së Kampionatit Evropian mes Spanjës dhe Francës, Alvarito iu përgjigj kështu atyre që e pyesnin pse duket gjithmonë i trishtuar: “Nuk jam aspak i trishtuar. Por është e vërtetë që në Spanjë e kam shumë të vështirë të jem i lumtur. Në fund është gjithmonë dikush diku që thotë diçka. Një ditë më parë bëra një gjest që kishte lidhje me grupin dhe disa njerëz e përdorën për të më kritikuar, si gjithmonë. Ose çështja e kartonit të verdhë, që nuk e dinim nëse më ishte dhënë apo jo dhe tashmë kishte njerëz që thoshin: ‘Ndoshta, le të luajmë më mirë pa të’. Këto gjëra dalin edhe kur jemi mirë...”.
Në Spanjë, është e vërtetë, kritikat ndaj tij janë të ashpra. Ndonjëherë të tepruara. Megjithatë ai vazhdon të jetë qendërsulmuesi kryesor. Trajnerët ndryshojnë, por ai është gjithmonë në vendin e tij. Si kapiten tani. Garancia: nuk shënon, mëson pak, por jep asiste për të shënuar të tjerët.
“A ndihem më i lumtur kur luaj jashtë vendit? Po, pa dyshim, – vazhdon Alvaro. – E kam thënë shumë herë, sidomos, sepse njerëzit më respektojnë. Në Spanjë nuk ka respekt për asgjë dhe askënd”. Milani është në gjurmët e tij. Dhe kush e di, ky shqetësim mund të sjellë një ndryshim për të.
Morata ka thënë disa herë ditët e fundit se nuk do të marrë vendime për të ardhmen e tij para përfundimit të Kampionatit Evropian. Por këto fjalë duken të qarta: gjërat nuk janë më mirë në Spanjë.
Gruaja e tij Alice është italiane, ai ka luajtur me Juventusin nga 2014 në 2016 dhe nga 2020 në 2022, kështu që kush e di nëse kthimi në Serie A nuk është vërtet zgjidhja për gjithçka.
“Çfarëdo që të ndodhë, le të ndodhë. Ndoshta kur të largohem do t’i mungojë dikujt, – shpjegon sulmuesi i Atletico Madridit, i cili është gati ta lejojë të ikë me një klauzolë prej 13 milionë eurosh. - Një ditë më parë, disa miq patën probleme, sepse kishin veshur fanellën time. Njerëzit i thoshin se jam i dëshpëruar. Ndoshta është zili, por nuk është e këndshme. Kjo është arsyeja pse unë jam duke menduar, edhe pse tani jam i fokusuar në Kampionatin Evropian, se ndoshta është më mirë që të mos qëndroj në Spanjë”. Milani e pret krahëhapur.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
