Gazeta Si - Vendimi për sekuestron e vilave të deputetes Monika Kryemadhi dhe nënës së saj është shtyrë për të martën (17 dhjetor) në orën 10:00.
E paraqitur në Apelin e GJKKO me një bastun në dorë, i cili e ndihmonte të ecte pas një lëndimi në këmbë, Kryemadhi tha se nuk bëhet fjalë për dy vila, por apartamente të cilat janë marrë me kredi.
Pas seancës, në një prononcim për mediat, Kryemadhi tha se çështjen do ta ndjekë deri në Strasburg. Ajo tregoi edhe situatën e krijuar kur agjentët e BKH shkuan në shtëpinë e saj para disa javësh, si dhe u shpreh e gatshme të jetojë edhe në çadër nëse mbetet pa shtëpi.
“Një nga gjërat ishte se arsyeja për sekuestrot e banesave se ju keni qejf t’u thoni vila, janë apartamente. Thanë pse ka marrë kredi dhe unë shtrova një pyetje gjyqtares dhe prokurorit, po ju që keni marrë kredi, jepni me qira është e ligjshme apo e paligjshme? Prokuroria nuk ka marrë ekspertë financiarë, kanë qëndruar në kuadrin e thashethemeve gazetareske. Me thënë të drejtën pretendimi është se meqë dyshohet Ilir Meta për çështjen CEZ/DIA dhe mamaja jote ka marrë shtëpi në mars 2010. Megjithatë janë justifikime, pse duhet të rezultonte tani kjo çështja e shtëpisë… Në vlerën që kanë përmendur për të intimiduar se ju e dini mirë që në raste të tilla kur dosjet dalin në media, është për të bërë padrejtësi nëpërmjet linçimit të njerëzve. Bëhet fjalë për 310 mijë euro, ata mbledhin të gjitha transaksionet që kanë qarkulluar në bankë duke ia vendosur mamasë time. Unë do ndjek të gjitha procedurat ligjore se jam e bindur që kjo çështje do vazhdojë në Strasburg. Atë ditë që kemi pasur gjyqin në Apel, 5 minuta para se të vija, 10 policë kanë zbarkuar në oborrin eshtëpisë time, ishte skenar intetesant për presion psikologjik. Mund të jetë edhe rastësi. Kanë ardhur dhe ditën tjetër, procesverbali u firmos nga unë dhe nëna ime”, deklaroi deputetja.
“Tani ne duhet të dalim nga shtëpia”, shtoi ajo. E kur u pyet nga gazetarët se ku do qëndrojë, u përgjigj me batutë: “Me çadër mo”!
Kryemadhi zbuloi mes t tjerash se është dëmtuar në këmbë duke bërë palestër, duke justifikuar kështu edhe mbajtjen e një bastuni, i cili e ndihmonte të ecte në këmbë.
“Ju e dini që unë bëj palestër shumë dhe kam vrarë pak gjurin, meniskun. Por edhe më pëlqen pak se është trend”, tha Kryemadhi.
GJKKO ka caktuar ndaj Monika Kryemadhit masës e sigurisë 'detyrim paraqitje', ndërsa po hetohet nga SPAK për tre akuza pastrim parash, korrupsion dhe mosdeklarim pasurish në lidhje me dosjen e CEZ DIA dhe lobimin e LSI-së në SHBA.
Po për këtë dosje po hetohet dhe bashkëshorti i saj, Ilir Meta, me të cilin është në proces divorci. Aktualisht Ilir Meta ndodhet në qeli, pasi ndaj tij është caktuar masa e sigurisë “arrest me burg”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
