Gazeta Si – Qindra miliona euro të shpenzuara në merkato dhe një barazim 0-0 me Fulhemin në kampionat. Për çmenduritë pa sens të Çelsit në merkato shtypi anglez citon titullin e këngës së njohur të Dire Straits, ‘Money for Nothing’ (Shumë para për asgjë).
Vërtet shumë para për asgjë. Çelsi duket si në fillimet e epokës së Abramoviçit, kur blinte pa fund, por rezultatet nuk ishin ato që priteshin. Edhe tani, me pronarët e rinj, klubi londinez po blen çdo lojtar që do, duke bërë blerje faraonike, siç ishte kjo e fundit, 120 milionë euro për Enco Fernandez, por skuadra në fushë nuk po fiton.
Në futboll jo gjithçka varet nga buxheti, sa miliona euro shpenzon. E rëndësishme është të dish t’i shpenzosh për një skuadër kompetitive. Aktualisht skuadra e drejtuar nga trajneri Poter mban vendin e 9-të, larg zonës Champions dhe me një ndeshje më shumë.
Në gjithë këtë histori, shtypi anglez nuk fal. Faqja e parë e Star Sport i dedikohej pikërisht barazimit shterpë të Çelsit në ‘Stamford Bridge’, me titullin ‘Money for Nothing’.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
