Autoriteti për Informimin mbi Dokumentet e ish-Sigurimit të Shtetit ka hartuar raportin vjetor për vitin 2019, ku ndryshe nga vitet e tjera vihen re dy ngërçe në raport me detyrat e qeverisë ndaj këtij institucioni.
Së pari, si pasojë e dëmtimeve nga tërmeti, ky autoritet është endur në disa seli dhe qeveria nuk akordoi asnjë fond për rikonstruksionin e godinës. Autoriteti arriti të përftonte një grant vetëm nga Qeveria Suedeze dhe zbatimi i projektit do të zgjasë një vit.
Ngërçi i dytë dhe jo pak i rëndësishëm është mungesa e bashkëpunimit me këtë Autoritet nga ana e ministrisë së Brëndshme. Autoriteti i Dosjeve nënvizon se ka vijuar komunikimi me institucionet që kanë detyrimin të identifikojnë dhe dorëzojnë dokumentet e ish-Sigurimit të Shtetit pranë tij. Proçesi në këtë drejtim ka qenë i fokusuar më së shumti në marrjen dhe dorëzimin e dokumenteve të ish-Sigurimit të Shtetit nga Arkivi i Sistemit të Ministrisë së Brendshme.
“Proçesi ka ecur me ritme shumë të ngadalta dhe nuk është përfunduar. Proçesi i marrjes në dorëzim të dokumenteve të ishSigurimit të Shtetit nga Arkivi i Sistemit të Ministrisë së Brendshme është pothuajse i bllokuar që nga muaji maj 2019”, - thuhet në raport.
Për zgjidhjen e kësaj situate, Autoriteti vëren se ka pasur komunikim të vazhdueshëm shkresor dhe takime me zyrtarë të lartë të ministrisë së Brendshme, porse situata mbetet e njëjtë.
Për vitin 2019 janë deklasifikuar rreth 561 dosje me mbi 90 mijë fletë dokumentesh. Janë mbyllur gjithashtu proçedurat e verifikimit për 342 kandidatë nga institucionet kushtetuese, nga të cilët 16 prej tyre figurojnë me dokumente të ish-Sigurimit të Shtetit, ose bashkëpunëtorë.
Autoriteti konstatoi gjithashtu pamundësinë e vijimit të proçedurës së verifikimit për 22 kandidatë, por pa përmendur emra konkret.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.