.png)
Gazeta Si – Pas një seance që zgjati vetëm 5 minuta, Gjykata e Posaçme shpalli vendimin ndaj anëtarëve të grupit kriminal të arrestuar në kuadër të dosjes “Metamorfoza”.
Në total, 3 prej të akuzuarve u dënuan me 21.6 vite burg, falë edhe gjykimit të shkurtuar që kanë përfituar sipas ligjit, ndërsa për ish-shefin e forcave operacionale, Oltion Bistri, masa u shua dhe u urdhërua lirimi i menjëhershëm nga qelia.
Edhe ish-Prokurrori i Kukësit, Xhevahir Lita u lirua menjëherë në sallën e gjyqqit, pasi kishte shlyer dënimin e plotë.
Ata akuzohen për korrupsion, shpërdorim detyre, përkrahje të autorit të krimit apo dhe për falsifikim dokumentash.
Oltion Bistri – U dënua me 2 vite burg për zbulim të të dhënave sekrete dhe u shpall i pafajshëm për korrupsion dhe pastrim parash. Ai lirohet sot, pasi dënimi i është llogaritur i shlyer gjatë paraburgimit. Ish-shefi i forcave Operacionale, akuzohej se kishte informuar biznesmenin Gjoka për një operacion policor kundër lojërave të fatit.
Xhevair Lita, ish-kryeprokuror i Kukësit – U dënua me 5 vite burg, që me gjykim të shkurtuar u ul në 3.4 vite. Për shkak të shlyerjes së dënimit, u urdhërua gjithashtu lirimi i menjëhershëm.
Xhevahir Lita dyshohej se kishte favorizuar lirimin e parakohshëm të Behar Bajrit në këmbim të përfitimeve monetare.
Edmond Preka – 10 vite burg, të reduktuara në 7 vite. Do t’i vuajë në burg të sigurisë së lartë.
Behar Brajoviç (Bajri) – 13 vite burg, të ulura në 8.8 vite me gjykim të shkurtuar. Vuajtja e dënimit në burg të sigurisë së lartë.
Astmer Bilali – 8 vite e 6 muaj burg, që pas uljes shkojnë në 5.8 vite. Edhe ai do të vuajë dënimin në burg të sigurisë së lartë.
Vendimi për ish-drejtuesin e policisë Ardit Hasanbegaj dhe biznesmenin strategjik Pëllumb Gjoka do të jepet më 2 dhjetor, pasi avokatët e tyre nuk kanë paraqitur ende mbrojtjen. Gjoka akuzohet se ka falsifikuar dokumentat me qëllim përfitimin e një sipërfaqeje toke në zonën bregdetare të Velipojës.
Të gjithë përfituan nga gjykimi i shkurtuar, që ul automatikisht 1/3 e dënimit në rast shpalljeje fajtor. Për vrasjen e Gjin Ndojit, pjesë e transkriptimeve të “Metamorfoza”, ku akuzohen Gjoka, Bajri dhe Preka, procedimi vazhdon veçmas me gjykim të zakonshëm.
Po ashtu, SPAK akuzon Behar Bajrin, Pëllumb Gjokën dhe Edmond Prekën për sigurimin e kushteve që do të mundësonin vrasjen e shtetasve Dorian Duli, Ibrahim Lici dhe Klanthi Musabelli.
Zbardhja e dosjes u bë mbi bazën e komunikimeve të siguruara nga aplikacioni SKY ECC, përdorim i të cilave është kundërshtuar nga disa prej avokatëve të të pandehurve, të cilët pretendojnë se provat janë marrë në mënyrë të paligjshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
