Presidenti Ilir Meta nuk e përmendi asnjëherë në emër Kryeministrin Edi Rama, por mesazhi i përcjellë paraditen e së premtes, para se të merrte pjesë në Konferencën e 3-të Kombëtare të Industrisë së Bimëve Mjekësore dhe Aromatike të Shqipërisë, qartësisht i drejtohej kreut të Qeverisë.
Vendosmërisë së Kryeministrit Edi Rama për të zhvilluar zgjedhjet vendore më 30 qershor, edhe pa pjesëmarrjen e Partisë Demokratike dhe Lëvizjes Socialiste për Integrim, Presidenti Meta iu përgjigj para gazetarëve me rikthimin disa dekada pas në kohë.
“Të gjithë t’i thërrasin mendjes dhe të marrin përgjegjësitë e tyre, sepse Shqipëria nuk ka pse të shkojë në përplasje për interesa egoiste dhe okulte. Shqiptarët janë ndarë me sistemet përjashtuese që në vitet ‘90”, tha ai.
Sa i takon deklaratës së Kryeministrit se nga Presidenti i Republikës nuk ka marrë asnjë ftesë për tryezë në përpjekje për të zgjidhur krizën politike, Meta e cilësoi përpjekje për t’i ikur përgjegjësisë.
Presidenti paralajmëroi se vendi është në një kurs përplasjeje civile.
“Askush nuk mund t’i transferojë përgjegjësitë tek të tjerët, aq më tepër tek Presidenti i Republikës. Ata e dinë vetë se çfarë duhet të bëjnë dhe duhet të jenë të përgjegjshëm në rast se do ta çojnë vendin drejt konfrontimit”, vijoi ai.
Ndërkohë, në konferencën e organizuar nga eksportuesit e bimëve mjekësore dhe aromatike, Meta përsëriti tërthorazi thirrjen se përplasja politike po dëmton interesat ekonomike të vendit, në veçanti turizmin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
