.png)
Meshkujt që marrin metforminë kanë më shumë gjasa të kenë fëmijë të lindur me defekte, sipas një studimi të ri. Të dhënat tregonin se defektet ishin afërsisht 40 për qind më të zakonshme tek të rinjtë, baballarëve të të cilëve u ishte dhënë mjekimi i zakonshëm.
Dhe rreziku që djemtë të kishin një defekt gjenital ishte tre herë më i lartë, sipas studimit të 1.1 milionë të porsalindurve. Ekspertët thonë se burrat që marrin ilaçin e diabetit që shpresojnë të kenë fëmijë, duhet të flasin me mjekët e tyre nëse duhet të ndërrojnë ilaçe. Megjithatë, ekipi paralajmëroi se vetë diabeti – një gjendje e vuajtur nga miliona burra – gjithashtu redukton cilësinë dhe fertilitetin e spermës.
Metformina është zakonisht ilaçi i parë që u rekomandohet pacientëve me diabet të tipit 2. Ilaçi kontrollon diabetin e tipit 2 duke reduktuar sasinë e sheqerit që mëlçia lëshon në trup dhe ul nivelin e sheqerit në gjak, duke përmirësuar rezistencën ndaj insulinës. Studiuesit në universitetet e Stanfordit dhe Danimarkës Jugore analizuan 1.1 milionë lindje në Danimarkë gjatë tre viteve të fundit. Ata ndërthurën të dhënat shëndetësore të të porsalindurve me recetat e baballarëve të tyre për ilaçet e diabetit insulinë, metforminë dhe sulfonilurea. Foshnjat konsideroheshin të ‘ekspozuara’ ndaj një ilaci nëse babai i tyre e kishte marrë ilaçin në tre muajt deri në ngjizje – që është koha kur po zhvillohet sperma fekonduese. Nga të gjitha foshnjat e përfshira në hulumtim, 3.3 për qind kanë lindur me një ose më shumë defekte të mëdha në lindje.
Por shifra ishte 5.2 për qind në mesin e të porsalindurve, baballarët e të cilëve merrnin metforminë, tregoi studimi i botuar në “Annals of Internal Medicine”.
Ekipi tha se kjo korrespondon me një rrezik 41 për qind më të lartë, krahasuar me ata që nuk e morën atë. Rezultatet treguan gjithashtu se mundësia për të pasur një djalë me defekte gjenitale të lindjes ishte tre herë më e lartë në mesin e djemve të përdoruesve të metforminës nga babai.
Megjithatë, baballarët që morën ilaçin para ose pas përpjekjes për të mbetur shtatzënë, nuk kishin një rrezik në rritje. Mendohet se metformina shtyp hormonet mashkullore si testosteroni dhe ndërhyn në shëndetin riprodhues mashkullor.
Ndërkohë, baballarët me insulinë nuk kishin rrezik të shtuar për të lindur një fëmijë me ndonjë defekt, krahasuar me baballarët që nuk e merrnin ilaçin.
Ekspertët thanë se ‘shtrirja e pandemisë së diabetit’ tregon që trajtimi i baballarëve të ardhshëm me diabet duhet të studiohet më tej.
Allan Pacey, një androlog në Universitetin e Sheffield dhe ish-kryetar i Shoqatës Britanike të Fertilitetit, i cili nuk ishte i përfshirë në studim, tha se metformina është “një ilaç i përdorur zakonisht tek meshkujt e moshës riprodhuese”.
“Pra, gjetjet ngrenë pyetje nëse burrat që marrin ilaçin dhe planifikojnë të krijojnë një familje në të ardhmen e afërt duhet të jenë të shqetësuar. Kjo duhet të diskutohet me mjekun e tyre të familjes ose specialistin e diabetit që kujdeset për ta”, përfundoi ai.
Burimi:Daily Mail/Përshtati:Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje