Gazeta Si – Qeveria meksikane ekstradoi të enjten në Shtetet e Bashkuara të Amerikës 29 trafikantë droge të kërkuar për krime që variojnë nga vrasja deri te trafiku ndërkombëtar i lëndëve narkotike.
Mes tyre është edhe Rafael Caro Quintero, një nga trafikantët më të famshëm të drogës në historinë e fundit, i cili prej rreth 40 vitesh ishte në krye të listës së personave më të kërkuar nga autoritetet amerikane me një shpërblim prej 20 milionë dollarësh, më i larti ndonjëherë.
E enjtja ishte dita e ekstradimit më të madh të trafikantëve të drogës në Shtetet e Bashkuara të kryer ndonjëherë nga Meksika.
Një përpjekje gjithashtu e qeverisë së presidentes meksikane Claudia Sheinbaum për të qenë bashkëpunuese me SHBA-të në një kohë kur presidenti Donald Trump kërcënon edhe një herë të vendosë sanksione 25 për qind ndaj të gjitha produkteve meksikane, edhe për shkak të asaj që Trump e përcakton si mangësi të Meksikës në luftën kundër trafikut të drogës.
Sipas Prokurores së Përgjithshme të SHBA-ve, Pam Bondi, disa nga kriminelët e ekstraduar tani mund të përballen me dënimin me vdekje, i cili nuk është me ligj në Meksikë.
Ekstradimi i Rafael Caro Quintero, i cili është 72 vjeç, konsiderohet i jashtëzakonshëm: “Ky është një moment tepër i rëndësishëm që shënon një pikë kthese”, tha për “Neë York Times” Ray Donovan, ish-kreu i operacioneve të DEA-s (Administrata e Zbatimit të Drogës, Agjencia Amerikane kundër Drogës).
Caro Quintero ishte një nga themeluesit e të ashtuquajturit karteli “Guadalajara”, organizata kriminale që krijoi trafikun modern ndërkombëtar të drogës në vitet 1980.
Në vitin 1985, ai rrëmbeu, torturoi dhe vrau Enrique “Kiki” Camarena, një agjent i DEA-s amerikane që po hetonte në fshehtësi aktivitetet kriminale të kartelit dhe bashkëpunëtorin e tij meksikan.
Vrasja e Enrique Camarena-s konsiderohet si një nga momentet më të rëndësishme në historinë e fundit të trafikut të drogës, sepse shënoi përfshirjen masive të Shteteve të Bashkuara në atë që në dekadat në vijim do të bëhej “lufta kundër trafikut të drogës”.
Në përgjigje të vrasjes së Camarena-s, Shtetet e Bashkuara nisën një operacion të madh antidrogë në Meksikë, i cili u pasua nga shumë të tjerë, të cilët gradualisht u bënë më të mëdha dhe më të militarizuara.
Imágenes exclusivas.
— Carlos Loret de Mola (@CarlosLoret) February 28, 2025
La entrega de Caro Quintero a Estados Unidos.
La presidenta Sheinbaum puede presumir que hizo lo que ningún otro presidente de México y a Trump puede presumir lo que ningún otro presidente había logrado. #Loret en @latinus_us pic.twitter.com/HSE9CvZgJ4
Caro Quintero u arrestua disa muaj pas vrasjes dhe u dënua me 40 vjet burg, që në atë kohë ishte dënimi maksimal në Meksikë. Në vitin 2013, pas 28 vitesh dënimi, ai u lirua për një defekt formal dhe u riarrestua vetëm në vitin 2022.
Gjatë viteve të arratisjes, ai dha intervista për disa media, ku pretendonte se nuk kishte më asnjë lidhje me trafikun e drogës.
Sipas hetuesve meksikanë dhe amerikanë, megjithatë, vitet e fundit Caro Quintero ishte një nga drejtuesit e kartelit “Caborca”, një organizatë kriminale rajonale e specializuar, ndër të tjera, në trafikimin e fentanilit opioid.
Mes 29 trafikantëve të ekstraduar të drogës ka edhe emra të tjerë të rëndësishëm. Këtu përfshihen Miguel Ángel Treviño Morales, kreu i kartelit “Zetas” dhe vëllai i tij, Omar Treviño Morales.
“Zetas” janë një nga kartelet kriminale më të dhunshme dhe të rrezikshme, të përbërë nga ish-anëtarë elitë të ushtrisë meksikane, të cilët dezertuan dhe iu bashkuan narkotrafikantëve.
Miguel Ángel Treviño Morales u bë i njohur për metodat jashtëzakonisht të përgjakshme me të cilat ai torturonte, duke vrarë armiqtë dhe të burgosurit e tij. Ai u arrestua në Meksikë në vitin 2013.
Attorney General Pamela Bondi Announces 29 Wanted Defendants from Mexico Taken into U.S. Custody
— U.S. Department of Justice (@TheJusticeDept) February 27, 2025
🔗: https://t.co/wsfvBNoZG6 pic.twitter.com/vbh8a8GIRz
Një tjetër emër i njohur, është ai i Vicente Carrillo Fuentes, ish-kreu i kartelit “Juárez”. Vicente u bë kreu i kartelit pas vdekjes së vëllait të tij, Amado Carrillo Fuentes, i cili u quajt “El señor de los cielos”, sepse ishte i pari që përdori një flotë avionësh privatë për trafikun e drogës.
Amado vdiq – sipas versionit më të akredituar – gjatë një operacioni plastik me të cilin ishte përpjekur të ndryshonte tiparet e fytyrës.
Ekstradimi i këtyre trafikantëve të drogës ndodhi ndërsa zyrtarë të ndryshëm të qeverisë meksikane ishin në Uashington për të diskutuar sigurinë me Sekretarin e Shtetit të SHBA-ve, Marco Rubio.
Vendimi është në fakt një shenjë e vullnetit të mirë nga ana e Meksikës, e cila dëshiron të tregojë se është e gatshme të bashkëpunojë me Shtetet e Bashkuara në luftën kundër trafikut të drogës.
Marrëdhëniet midis dy vendeve në këtë fushë kanë qenë në fakt gjithmonë shumë të forta: pothuajse të gjitha qeveritë meksikane kanë lejuar një hapësirë të madhe manovrimi për operacionet e SHBA-ve kundër drogës në territorin e tyre.
Por Trump prej vitesh ka akuzuar Meksikën se nuk bën mjaftueshëm, veçanërisht kundër trafikut të fentanilit, duke injoruar se situata është jashtëzakonisht e ndërlikuar dhe përgjegjësitë janë të ndara: trafiku i drogës nga jugu në veri korrespondon me trafikun e armëve nga veriu në jug, gjë që ka lejuar që narkotrafikantët të bëhen të fuqishëm ushtarakisht.
Në ditën e parë të mandatit të tij të dytë, Trump nënshkroi një urdhër ekzekutiv që përcaktonte kartelet e drogës si “organizata terroriste globale” dhe vazhdoi të ushtronte presion ndaj Meksikës për veprime më të forta.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
