.png)
Gazeta Si- Shtyhet për në datë 7 prill seanca gjyqësore në GJKKO në ngarkim të ish-ministrit të Mbrojtjes Fatmir Mediu mbi tragjedinë e Gërdecit, ku 26 persona humbën jetën si pasojë e shpërthimit të fabrikës së demontimit të armëve.
Shkak për shtyrjen e seancës u bë mungesa e Mediut për shkak të një ftese që i ishte bërë për të qenë i pranishëm në Kongresin Amerikan. Sipas burimeve paraprake, prokurori i SPAK, Klodian Braho e quajti “të pajustifikuar mungesën” e ish-ministrit.
Ndërsa gjyqtarja Irena Gjoka, vendosi shtyrjen e seancës duke i tërhequr vëmendjen avokatëve mbrojtës të Mediut, i cili nga data 24 mars deri më 1 prill është i ftuar në Kongresin e SHBA.
Ndërsa kjo është e dyta herë radhazi që seanca në GJKKO shtyhet për shkak se Mediu ndodhet në SHBA.
Zamira Durda, nëna e një 7 vjeçari që humbi jetën si pasojë e shpërthimit u shpreh për mediat se procesi po zvarritet dhe se ende nuk ka gjetur drejtësi edhe pas 17 vitesh.
Në seancat e fundit, Mediu vijon të kundërshtojë gjetjet e ekspertëve ushtarakë në lidhje me masat që do duhej të merreshin për demontimin e municioneve në Gërdec.
Akt-ekspertimi në atë kohë tregon se shtetit iu shkaktua një dëm prej 59 mln Lekësh, pasi nuk ishte përllogaritur transporti i municioneve. Nga shpërthimi në Gërdec më 15 Mars 2008 humbën jetën të paktën 26 persona e u plagosën qindra të tjerë.
SPAK thotë se Mediu shpërdoroi detyrën me nxjerrjen e disa akteve nënligjore që kanë sjell avantazhe për shoqëritë private që do kryenin demontimin. Vetë ish-ministri i ka mohuar të gjitha akuzat.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
