Kryetari i AAK-së, Ramush Haradinaj ka bërë një lëvizje të beftë. Përmes një postimi në Facebook ai ka njoftuar se ka vizituar familjen e Hashim Thaçit.
Përmes një blloku fotosh, Haradinaj shkruan se përtej dallimeve politike, ai besoj se Hashim Thaçi është i pastër.
“Kisha nderin që me bashkëpunëtorë, ta vizitoj familjen e Haxhi dhe Hyre Thaçit, prindërit e Presidentit Hashim Thaçi.
Njëherësh për ta kam ndarë medaljen “ME BESIM NË ZOT, ATDHE E SHTET” për kontribut të jashtëzakonshëm në çështjen kombëtare.
Themeli i lirisë dhe Shtetit të Kosovës është Lufta e Ushtrisë Çlirimtare të Kosovës, udhëhequr nga Komandanti Legjendar Adem Jashari.
Luftë më të drejtë, më të pastër e më fisnike, për çlirim nga pushtimi i egër millosheviqian, nuk do të njohë asnjëherë njerëzimi.
Përtej dallimeve politike, unë besoj fuqishëm në drejtësinë ndërkombëtare, pastërtinë e luftës sonë dhe pafajësinë e të gjithë bashkëluftëtarëve, në këtë rrafsh edhe të Hashim Thaçit!”, shkruan Haradinaj, duke përcjellë edhe disa foto ku një grup burrash janë ulur në një tryezë me prindërit e Thaçit, duke vënë disa herë dorën në zemër, një shenjë për një bisede të sinqertë mes palëve
Hashim Thaçi, ish- drejtuesi politik i UÇK-së, vijon të jetë në paraburgim në Hagë, qyshkur dha dorëheqjen si president i Kosovës dhe u dorëzua në gjykatë, pas konfirmimit të një aktakuze që e akuzonte atë për krime lufte dhe krime kundër njerëzimit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
