Gazeta Si – Trupi i 14-vjeçarit që u zhduk një ditë më parë në brigjet e lumit Seman, është gjetur këtë të enjte një kilometër larg vendit ku peshkonte në fshatin Suk 1 Roskovec, në Fier.
Mëngjesin e kësaj të enjteje në vendngjarje kanë shkuar edhe polumbarët e repartit RENEA, të cilët janë ndihmuar edhe nga banorët e zonës.
Por kjo nuk është e para fatkeqësi për familjen, pasi 10 vite më parë i është mbytur edhe një tjetër djalë në të njëjtin vend.
Përgjatë gjithë natës familjarë të të miturit dhe banorë të zonës kanë ngritur prita, në tentativë për të gjetur trupin e djalit, por pa mundur dot.
Të gjitha dyshimet janë se 14 vjeçari ka hyrë në ujë për të nxjerrë grepat, të cilat mendohet se i kanë ngecur në lumë.
Fqinjët tregojnë se janë familje shumë e mirë, por në vështirësi ekonomike. Sipas tyre ndihma ekonomike që merrnin i është ndërprerë.
Duket se fëmija ka patur fatin e të vëllait, i cili u mbyt 10 vite më parë, në po të njëjtin lumë. Skena duket e njëjtë. Shapkat dhe rrobat e lëna në breg, teksa i vogli ishte duke luajtur me shishe uji.
“Janë shumë hallexhinj, në punë dhe hall të tyre. Babai i ka lënë ka 4 vjet. Edhe një vëlla i është mbytur para 10 vitesh këtu. Këta me ndihmë ekonomike rrojnë, tani ia kanë ndërprerë fare. Kanaçe mblidhnin. Shumë çun i mirë ishte djali. E shikoja që gjuante këtu peshk. Nuk e kanë gjetur ende, do ta ketë marrë rryma”, – thotë një fqinj i tyre.
Policia thotë se po punohet për gjetjen e 14-vjeçarit dhe zbardhjen e rrethanave të ngjarjes.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
