.png)
Nga Gazeta Si- Gjykata Kushtetuese ka pranuar të shqyrtojë vendimin e qeverisë për mbylljen e TikTok, por ka rrëzuar kërkesën për pezullimin e menjëhershëm të tij.
Gjykata vendosi kalimin e çështjes në seancë publike, duke ftuar si palë të interesuara Autoritetin Kombëtar për Sigurinë Kibernetike dhe Agjencinë Kombëtare të Shoqërisë së Informacionit. Gjykata kërkon që të dorëzojnë parashtrime me shkrim nëse kanë argumente shtesë për çështjen.
Kjo kërkesë ishte bërë nga Asociacioni për Gazetarët Shqiptarë, të cilët në një reagim, thonë se ky është një hap i rëndësishëm në mbrojtje të lirisë së shprehjes dhe të drejtës së informimit.
“Ne jemi të bindur se ndalimi i një platforme të komunikimit publik, pa transparencë dhe pa vlerësim proporcional të ndikimit të saj, përbën një precedent të rrezikshëm për liritë themelore në vend”, thuhet në njoftim.
Megjithëse Gjykata ka vendosur të mos pranojë kërkesën për pezullimin e menjëhershëm të vendimit të qeverisë, për AGSH, shqyrtimi në themel i çështjes në seancë publike është tregues i seriozitetit dhe rëndësisë që kjo çështje përfaqëson.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
