Bregdeti i Ranës së Hedhur në Shëngjin, është mbushur me pula të ngordhura. Nuk dihet nëse këto pula janë hedhur në këtë zonë apo janë sjellë nga dallgët e detit.
Deri tani, në terren nuk ka shkuar asnjë nga institucionet përgjegjëse për të verifikuar situatën. Kjo ndodh në një kohë që gripi i shpendëve ka prekur dhe vendin tonë e deri më tani kemi mijëra pula të ngordhura.
Nuk është përcaktuar shkaku i ngordhjes së këtyre shpendëve, ndërsa sipas të dhënave zyrtare, deri tani në qarkun e Lezhës nuk ka asnjë rast me gripin e shpendëve.
Para disa ditësh u zbulua një vatër e gripit të shpendëve në Shkodër.
Virusi është konstatuar në zonën e Suka Dajcit, ndërsa pozitive ka rezultuar një pulë oborri në një familje.
Raste të gripit të shpendëve janë zbuluar më herët edhe në Durrës, Divjakë, Dibër dhe Korçë.
Në njoftimin e fundit, më 29 mars, Ministria e Bujqësisë bëri me dije se situata me gripin e shpendëve po monitorohej në të gjithë vendin, ndërsa janë 5 vatra aktive, përkatësisht në Korçë, Divjakë, Durrës, Vlorë dhe Dibër.
Rastet e para me gripin e shpendëve në vend janë regjistruar më 19 mars, ku më së shumti janë prekur pulat e fermave.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
