Gazeta Si – Mbreti Charles III është shtruar në një klinikë private të Londrës për t’iu nënshtruar një operacioni të planifikuar të prostatës, siç njoftoi Buckingham Palace.
Mbretëresha Camilla e shoqëroi në spitalin privat në kryeqytetin anglez, i cili është i njëjti ku ndodhet Princesha Kate Middleton, e cila po shërohet nga një operacion abdominal.
Mbreti Charles ndodhej në një makinë me Mbretëreshën Camilla. Një lëvizje e pazakontë, sepse gjatë mbretërimit të Mbretëreshës Elizabeth, ishte zakon që Sovrania dhe bashkëshorti i saj, Princi Philip të shkonin vetëm në klinikë në rast të shtrimit në spital.
Një zëdhënës i Pallatit Buckingham, tha: “Mbreti u shtrua në një spital në Londër këtë mëngjes për trajtim të planifikuar. Madhëria e tij dëshiron të falënderojë të gjithë ata që kanë dërguar urimet e tyre të mira gjatë javës së kaluar dhe është i kënaqur të dëgjojë se diagnoza e tij ka një ndikim pozitiv në ndërgjegjësimin e shëndetit publik”.
Mbreti Charles u shtrua në spital sepse ishte e nevojshme një “procedurë korrigjuese e prostatës”, siç njoftohet në deklaratën e lëshuar nga Pallati në ditën kur u zbulua lajmi për shtrimin në spital të Kate Middleton për një operacion misterioz në bark.
Njoftimi i shtrimit të tij të afërt në spital ka hedhur një hije mbi stabilitetin e mbretërimit të tij dhe ka rindezur thashethemet e pakontrolluara të abdikimit në favor të Princit William.
Në realitet, javën e kaluar, Sovrani zgjodhi të bënte të njohura kushtet e tij shëndetësore për të gjeneruar ndërgjegjësim për nevojën për parandalim: një lëvizje që duket të jetë e pazakontë në Mbretërinë e Bashkuar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
