.png)
Nga Gazeta Si- Me nisjen e vitit të ri shkollor, Shqipëria gjendet në “ethet” e Covid dhe virozave të cilat për nga ngjashmëria e simptomave i përafrohen njëra-tjetrës.
Ndonëse në faqen zyrtare në internet, Instituti i Shëndetit Publik nuk raporton të dhënat më të fundit, ajo çka shihet nga java e parë e shtatorit, është rritja e ndjeshme e infeksioneve që në total kap shifrën e 14 mijë rasteve në javën 1-7 shtator.
Këto të dhëna reflektojnë situatën në fund të sezonit veror, ku sipas raportit zyrtar të ISHP, numri më i madh i infeksioneve i përket atyre respiratore, ku 6545 pacientë u shtruan në urgjencat spitalore.
Ndërsa 2345 pacientë u prekën nga inkesionet respiratore të poshtme dhe 4463 u prekën nga diarretë.
Sipas ekspertëve të shëndetit publik, fillimi i vitit shkollor ka shtuar qarkullimin intensiv të virozave dhe Covid, duke shtuar numrin e pacientëve.
Mjekët këshillojnë që në çdo rast, t’i drejtohen qendrave shëndetësore për të marrë mjekimin e duhur si dhe të izolojnë fëmijët për disa ditë në shtëpi.
Nga rastet e evidentuara prej sistemit të survejancës, ajo që të bie në sy është mungesa e raportimeve për Covid-19, ndonëse në Shqipëri variantet më të fundit qarkullojnë intensivisht.
Sipas mjekëve, gjatë kësaj periudhe ka patur raste të dyshuara me Covid, ku mbizotëron temperature e lartë, dhimbje fyti dhe trupi, por ISHP nuk kryen më testime për Covid.
E vetmja mënyrë për diagnostikimin e tij mbeten analizat e gjakut, por mjekët thonë se shumë prej pacientëve të sëmurë nuk kryejnë analiza duke pretenduar ta kalojnë sëmundjen në shtëpi si një grip i lehtë.
Edhe varicela ka qenë prezent në këtë periudhë, ku nga hetimi epidemiologjik dhe konsultat me mjekët e familjes, mjekun infeksionist dhe atë epidemiolog, 5 raste në Tiranë dhe 1 rast në Fier janë të dyshuar për varicelë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
